雅虎香港新聞 微軟死機｜航班取消 過百港人被困日本機場禁區 苦主批快運失當形如「禁錮」 乘客靠食手信充飢｜Yahoo
【Yahoo 新聞報道】微軟周五（19 日）全球服務一度中斷，香港快運亦因此受影響，有來往香港和東京的航班最終取消，但乘客被逼因而在成田機場禁區內苦候十小時。有滯留的港人質疑，快運明知起飛機會微，仍未及早安排乘客離去，令過百人被困禁區數小時，「餐廳閂晒，淨係得幾部汽水機」，有乘客需要「拆手信食充飢」，最終擾攘至深夜，期間乘客滯留機場未知歸期，「幾廿歲瞓機場」，形容快運「禁錮咗一班乘客喺禁區幾個鐘」。最終他亦決定購買其他航空公司航班，希望盡快回港。
「地勤話有機會今晚可以起飛」
苦主陳先生接受《Yahoo新聞》訪問時指，原定於日本時間7月19日晚上8時40分乘坐UO651航班，由東京成田機場返香港。陳先生早在傍晚六時已到達機場報到櫃檯了解情況，到達時人龍已屆過百人，而他亦得知上一班原定於7時20分起飛的航班亦有延誤，陳先生在櫃檯報到時曾詢問地勤，「地勤話有機會今晚可以起飛」。
饑寒交逼 乘客鼓譟
陳先生最終於晚上九時許完成進入櫃檯報到手續進入禁區，他指排隊等待期間，香港快運並無更新航班起飛時間，「當時部份乘客都已經有心理準備，班機有一半機會飛唔到，但係航空公司一路都無回應」，直至進入禁區後才得知航班延至晚上11時45分。大批乘客被要求逗留在禁區指定位置，「因為乘客已經出咗境，都有日本警察看住個門口唔畀人離開」，乘客亦開始鼓躁。由於禁區餐廳已經關門，陳先生指乘客所處範圍只得數部汽水機，「無水、又無嘢食派畀我哋……冷氣有啲凍，老人小朋友有啲多」，有乘客難抵飢餓，只好「拆手信」進食。
地勤稱每人獲賠100美元
直至日本時間凌晨約兩點，「地勤人員要求我哋排好一行畀佢點人數」，但一直無交代原因，15分鐘後宣佈要求乘客離開禁區並取回行李，最初有乘客鼓躁認為安排不合理而不願合作，但10分鐘後有警員介入，「話如果乘客再逗留喺禁區就唔符合日本法規之類」，而地勤人員亦強調事故會有100美元賠償金予乘客。
不過陳先生指，即使有100美元賠償金，「咁急都book唔到酒店」。走出禁區時他已餓了10小時，終可在機場深夜唯一營業的餐廳吉野家吃飯，「好彩（前一天下午）四點幾喺機場食咗個鰻魚飯，如果唔係死咗喇！」由於香港快運仍未有確實回覆航班何時才能起飛，陳先生亦決定以12,500飛行里數換取日本時間7月20日早上九時許的國泰航班回港。
陳先生指明白微軟全球服務中斷影響航班，但航班抵達日本已有延誤，「飛機仲要入油、要清潔，究竟快運係咪早就知道其實起飛機會好微，只係佢哋夾硬想搏一搏送呢班人（乘客）走？」他亦批評此決定猶如「禁錮咗一班乘客喺禁區幾個鐘」，反映香港快運安排失當，「沒有期望就沒有失望」。
相關報道：
微軟全球死機｜香港快運：周六有 20 班航班取消 將安排改行程或退款｜Yahoo
