愛回家｜伍仲衡大晒與熊家合照將加入劇組？照片透露有「三舊將」回歸

伍仲衡於TVB歌唱真人騷《中年好聲音》擔任評判，風趣幽默嘅評語收獲不少粉絲，近日佢於社交平台透露自己拍劇，雖然未有講明係為邊套劇開工，但伍仲衡就貼出一張與《愛‧回家之開心速遞》一班演員食飯嘅合照，唔少網民估計伍仲衡將客串演出《愛‧回家之開心速遞》，又表示相信該集播出當晚收視將創新高。

伍仲衡連日來於社交平台PO出多張工作照；首先，分享TVB電視城嘅照片，寫道：「晨咁早，今日嚟……拍劇，客串吓姐」，再嚟就係貼出喺公司Cafe同《愛‧回家之開心速遞》演員嘅合照，以及喺化妝間化妝嘅自拍照，指自己第二日開工。網民都表示相當期待，留言叫伍仲衡努力加油：「呀sir，加油呀，到時記得提我地睇呀」、「慢慢會變成主角」、「伍sir，唱彈優則演！真係估您唔到呢～利害利害啊」、「播出當晚收視肯定創新高」、「究竟飾演咩角色呢，係未長期吾島嘅王子呀」、「我諗你拍劇都好受歡迎」等等。

從伍仲衡嘅照片中，除咗劉丹、呂慧儀、單立文、湯盈盈及古佩玲，亦見到久未於劇集露面嘅「金城安」周嘉洛和「秦博思」馬貫東，前者不時因拍正劇暫別《愛‧回家》劇組；後者則於2019年劇情交代佢與Mandy（謝芷倫飾）雙雙前往英國發展從而淡出，當時唔少網民都希望馬貫東可於不久將來回歸大家庭，但馬貫東之後僅於2020年客串過一集《愛‧回家》。此外，胡渭康同樣喺社交平台分享同一個場景與《愛‧回家》演員嘅合照，不過佢就坐咗伍仲衡嘅位置，表示：「愛回家之加雙筷」，唔少網民都留言詢問胡渭康係咪回歸劇組。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！