【心灰意冷？】加入無綫37年 劉江突然宣布離巢

現年73歲嘅資深甘草演員「劉老師」劉江，自1966年加入影壇，入行而今超過50年，演過嘅經典角色多不勝數。噚晚更憑《金宵大廈》中飾演書店老闆林若思一角，獲提名《萬千星輝頒獎禮2019》最佳男配角，不過最終輸俾《愛·回家之開心速遞》飾演金城安嘅周嘉洛。盛裝出席嘅劉江，喺噚晚突然自爆即將約滿離巢。

劉江喺接受傳媒訪問時自爆喺星期二（14日）約滿離巢，被問及原因嘅時候，佢就唔肯透露，只係話公司要清假，呢兩日原本唔使返工，出席頒獎典禮只係對《金宵大廈》有情誼結，同埋又有提名最佳男配角。被問《金宵大廈》成績不似外界預期會唔會失望時，劉老師就話冇乜失望，多年嚟頒獎典禮係點大家心知肚明，有咩好失望。至於係公司定係雙方嘅決定，佢就話喺無綫工作咗37年，有時做嘢做到凌晨3至4點，之後揸車返屋企，都唔知自己做緊咩。如果要佢講，佢講唔出口，不過要多謝無綫。佢仲話對公司同事有依依不捨嘅感覺，但做人一定要有底線。傳媒再問有咩觸及底線時，劉老師就話唔講喇，喺無綫做咗咁多年，公司對佢好好。

最後，劉老師講到明自己仲有戲癮，揚言仲有團火，唔會退休，出面如果有認為適合佢嘅都可以搵佢拍戲，不過就唔會做返之前嘅武師工作。