【快閃兩日遊】新加坡兩日一夜行程！嘆No.1肉骨茶＋平民掃街

新加坡航空近年大年拓展航線，好多都係歐美線，要經新加坡轉機，亦同時Offer大家可以停埋新加坡玩再轉機都得；新加坡話大唔大，但都唔算細，要玩兩日一夜都無從下手。今次為大家介紹呢個兩日遊，唔會太趕又玩到最基本嘅新加坡。呢個每年都進化嘅國家，的確有其嘅特色，新舊共融，可以玩嘅嘢多得很呢！

Day 1: 中午

嘆No.1肉骨茶 睇魚尾獅

由樟宜機場離開，第一站梗係去醫肚！我知大家應該都一定會去魚尾獅（除非去過N次）；咁醫肚嘅地方就當然要近啲。大家都知新加坡美食之一，一定要數到肉骨茶，由中藥材料製湯加埋燉排骨，新加坡既然係原創地，不過要數No.1肉骨茶，當地人一定推介松發，而位於魚尾獅附近呢間松發就係總店。有50年歷史老字號，由小販車仔檔做起到而家有8間分店，可以話係最代表到肉骨茶嘅店，於2016年更入選新加坡米芝蓮必食推介！

松發係新加坡肉骨茶Number 1 。

肉骨茶用中藥湯底，藥燉排骨。

松發於2016年入選新加坡米芝蓮必食推介。

松發肉骨茶（克拉碼頭總店）

地址：1, 11New Bridge Road, Singapore

營業時間：9AM至9:15PM（星期一休息）

夜晚

牛車水地道掃街買手信

可能大家都知新加坡有金沙酒店，附近有海邊，而四周都裝修得五光十色，有唔少餐廳；不過當然嗰度價錢特別貴而且有劏客感覺，想體驗傳統新加坡，其實可以嚟牛車水！牛車水有夜市、紀念品街、小食店等，係一個極為傳統嘅旅遊區，而且環境衛生乾淨，有時仲有Live Music駐場歌手為大家免費提供音樂。買完手信大家可以揀一間大排檔坐低啤一啤，食隻胡椒蟹，價錢隨時比海濱嗰度平兩、三成！

牛車水係新加坡唐人街，有唔少特色商店。

當中有美食中心，全部係小店。

環境衛生乾淨，食得安心！

牛車水

地區：為「牛車水」地鐵一出整個區域

營業時間：多數店舖營業至半夜

Day 2: 上午

濱海花園半天遊

好多人會去新加坡嘅環球影城，不過想清靜啲，甚至免費娛樂的話，呢個濱海花園絕對可以玩足半日。濱海花園係新加坡希望建一個樹林於城市之中，綠化環境，所以花園入面全部都係多種類植物。當中最觸目當然就係擎天樹；另外有室內溫室花園，分成 9 個區域種有世界各地不同氣候嘅植物、花卉。除咗遊花園，另外有天空步道及摩天輪等可以另外買飛去玩，豐儉由人。

天空樹，又稱為擎天樹，係花園最大影相位。

分為9大溫室，種植不同植物。

由Skywalk天空步道，可以於空中望花園壯觀景色。

濱海花園

地點：地鐵「海灣舫」站

營運時間：9AM至9PM（部分設施時間有所不同）

夜晚

機場嘆咖央多 24小時都食得

係時候返機場喇，但咪以為行程就此完結呀！樟宜機場已經連續好幾年被選為世界最佳機場，當中嘅設施當然係最頂級，連帶機場入面都有唔少好嘢食。大家上機前一於去食亞坤！我知我知，香港都有開嘛，不過既然去到新加坡，又唔使特登去搵，就喺機場就可以食正宗咖央多，可樂而不為先？而且仲要係24小時營業，幾夜都有得食！記住加埋杯奶茶，或者再加碗叻沙，咁就唔怕上機肚仔餓啦！

亞坤機場店係24小時開業，唔怕太遲！

以咖央多及奶茶起家，係咪好吸引呢？

仲有手信，大家可以買咖央醬等送畀人！

亞坤（機場店）

地址：樟宜機場3號大樓B2層

營業時間：24小時營業

【立即讚好】全新 Yahoo 旅遊 Facebook 專頁

Yahoo 旅遊以全新樣貌登場，Facebook 專頁當然同時煥然一新！立即讚好，每日睇盡旅遊新資訊！