忽然愛國 3個完全投入祖國懷抱嘅港星

南海仲裁之後，微博又掀起咗陣「愛國表態」潮，只要唔表態就會被班「玻璃心」嘅內地網民圍插，好不幸，今次被人插得最勁嘅就係阿Sa蔡卓妍啦。無法啦，邊個叫佢放張工作相，唔轉載「中國一點都不能少」嘅圖。

有人愁就有人歡喜，唔少上咗大陸做嘢嘅港星，拿拿聲表示吓自己幾愛國，keep住啲人氣，以下3個就因為近年喺內地爆紅，以至於完全投入祖國懷抱嘅港星啦：

1. Angelababy

Angelababy嫁咗畀黃曉明三日唔埋兩日就曬恩愛，國內人氣又極高，早排仲有得拍荷里活電影《天煞2》，當然不時要為祖國說好話啦，今次南海糾紛就喺微博轉載《人民日報》嘅報道兼留言：「愛好和平，但在主權和領土問題上決不退讓。」Baby自從由香港𡃁模變成大陸「四大花旦」，劇接劇戲接戲，身家暴升，又點可以唔親近親近祖國，唉，好少再聽到Baby用廣東話接受訪問啦⋯⋯

2. 王祖藍

王祖藍憑住扮嘢才能，係湖南衞視 《百變大咖秀》一炮而紅，打開內地市場，之後成為《奔跑吧兄弟》四季常駐主持，更加令佢係內地綜藝節目穩佔一席位，賺到盤滿砵滿。所以為咗揸緊國內呢條大水喉，當然加入愛國行列，之前先喺微博整張閱兵敬禮相。今次南海問題當然都唔執輸，轉載咗張「中國一點都不能少」嘅《人民日報》圖，佢老婆李亞藍都即刻表態「寸土必爭！寸土不讓！」，呢啲咪夫唱婦隨囉。

3. 陳偉霆

「而我不知道陳偉霆是誰」嘅「的士陳」，自從2014年憑劇集《古劍奇譚》大師兄一角喺大陸爆紅，就搖身一變為愛國好青年，無論係國慶、閱兵、定今次南海主權，都一一喺微博表態撐中國，仲高呼「祖國窩愛你」（無打錯字，佢微博係咁寫）。緊係啦，大陸市場令佢打入「福布斯中國名人榜」，拍嘅幾部劇集好似《因為愛情有幸福》、《老九門》都收視第一，好男人形象深得內地Fans心，唔繼續愛國，留唔住Fans仲點搵食？

圖片來源：蔡卓妍微博、Angelababy微博、王祖藍微博、陳偉霆微博