情人節之選！2月份甜蜜蜜下午茶推介

除咗農曆新年，好快就係情人節嘅嚟臨，想搵間靚靚餐廳同伴侶嘆個tea，睇吓以下呢幾間餐廳嘅下午茶邊間啱你心水～

維港半島經典下午茶 半島酒店×天星小輪

想一邊嘆下午茶一邊遨遊壯麗維港？呢間酒店就幫到你啦！佢哋今年同天星小輪合作推出海上美食體驗，「維港半島經典下午茶」航線將帶領客人遊覽尖沙咀同將軍澳跨灣大橋，食客可一邊享用各式鹹甜美點。鹹點包括吞拿魚尼斯法式薄餅、蘆筍和車打芝士蛋餅等，甜點就有蘋果肉桂焦糖餡餅同栗子朱古力芝麻脆餅等。

供應時間：即日起至六月，逢星期六、日13:00或16:00起航

點心航遊、下午茶航遊 張保仔帆船

呢個帆船下午茶都一樣咁浪漫～登上香港最具標誌性嘅紅帆木船，一邊欣賞璀璨星空，一邊享用點心同甜品。點心係由Dim Sum Library嘅廚師精心製作，甜品則嚟自Aqua，質素一定有保證，加HK$150即可享用埋Mini Moët酩悅迷你香檳添！如果喺情人節正日上船，重會特別提供情人節甜點呀。

供應時間：即日起直至餐廳另行通知
點心航遊：星期一至日：13:00或13:15起航
下午茶航遊：星期日至五：15:00或15:15起航，星期六：16:00或16:30起航

The Blooms by ÉPURE下午茶體驗 ÉPURE

米芝蓮一星嘅現代法國餐廳，最近將露台花園升級為The Blooms by ÉPURE，佈滿花卉裝置藝術同色彩斑斕嘅花卉，啱晒影相。全新法式下午茶主打法式小食同糕點，包括經典法式火腿三明治、煙三文魚配薯仔同法式馬卡龍等。想再食好啲可挑選The Royal版本，有煙三文魚配薯仔添上魚子醬、法式龍蝦包同埋黑松露芝士三文治！

供應時間：即日起直至餐廳另行通知，星期一至日：15:00-17:30

「川寧茶韻」英式下午茶 Garden Lounge

同英國優質茶葉及花草茶品牌TWININGS聯乘推出英式下午茶，前菜小食有呢個充滿特色嘅黑松露蘑菇仕女伯爵紅茶蛋批，忌廉以仕女伯爵紅茶葉浸泡過夜，加入適量黑松露，每一啖都有淡淡香橙、檸檬、佛手柑嘅茶甘同菇菌香氣。甜品就有士多啤梨香芒花草茶慕斯、英倫茗香伯爵紅茶歌劇院蛋糕同醇煎綠茶芝士蛋糕等，好吸引呀～而凡惠顧呢個下午茶，有機會獲得精美禮品一份，包括利是封、皇家伯爵香氛蠟燭、茶漏連掛墜以及精選茶包套裝（禮品隨機送出，送完即止）。

供應時間：即日起至4月7日
星期一至五：14:45-18:00
週末及公眾假期：第一節｜14:45-16:30分，第二節｜15:15-17:45，第三節｜16:30-18:00

托腮貓Gloomie繁花蜜意情人節下午茶 Sky Lounge × LeonLollipop

呢間就聯乘本地創作藝術家LeonLollipop推出托腮貓Gloomie節日下午茶，主打加入港式元素嘅鹹點同加入新春元素嘅甜點～港式情懷鹹點包括菠蘿叉燒撻，金黃嘅菠蘿麵包酥皮配上蜜汁叉燒內餡，甜甜鹹鹹好過癮；而沙嗲牛肉包結合咗香港經典茶餐廳美食嘅精華，都好值得一試。甜品就有玫瑰紅桑子朱古力撻、紅粉緋緋士多啤梨開心果蛋糕，都好有特色！留意每位惠顧下午茶嘅客人，可獲限量LeonLollipop「托腮貓 Gloomie」新春賀年或情人節化妝袋一份。

供應時間：2024年2月14日至3月17日，星期一至日：14:30-18:00

「春日果漾」下午茶 Umami x MALIN+GOETZ

日式居酒屋同紐約護膚品牌合作推出嘅日式下午茶，啱晒日本控！前菜有日本大根甘辛煮配黑豆甘露煮、明太子玉子燒、炸紫蘇葉雞軟骨丸等。甜品就有一系列香港人至愛嘅日式糕點，如士多啤梨大福同士多啤梨千層酥，前者香甜軟糯，後者酥脆可口，清新微酸。重有香濃鬆軟抹茶紅豆卷、絲滑細膩嘅沖繩黑糖布甸，以及輕盈清爽帶花香嘅櫻花水信玄餅等。

供應時間：即日起至3月31日，星期一至日：15:00-17:00

「如意龍年下午茶」連龍年限定版港麗小熊 樂聚廊

下午茶以時尚嘅兩層棕色寶盒呈上，其中甜品有桔仔造型嘅柑橘慕絲蛋糕，酸酸甜甜好清新，重有紅桑子朱古力蛋糕，入口細膩綿密。如果喺2月14日情人節當日品嚐下午茶，紅桑子朱古力蛋糕會換上紅色心形造型，好浪漫呀。 而滋味鹹點有百里香蜂蜜蜜瓜配番茄羊奶芝士、醒胃爽脆嘅三文魚醃蘿蔔福袋、口感豐富嘅鮮蝦刁草忌廉芝士撻等～

供應時間：即日至2月29日
2月1日至9日，2月14日至29日｜星期一至日及公眾假期：15:00-17:30
2月10日至13日｜首輪：13:00-15:00，次輪：15:30-17:00

文：Yanica
編：Cathy