愛回家丨龔燁失憶賤精回歸 龔水CP甜蜜不再 網民鬧爆：編劇技窮到要玩失憶

TVB處境劇《愛·回家之開心速遞》一直深受劇迷同網民愛戴，贏盡口碑及收視。唔少劇中演員成功入屋，有幾對劇集CP仲深入民心，包括「龔水CP」張景淳及呂慧儀，不過最近嘅劇情就令到「龔水迷」非常不滿，仲留言激動鬧爆編劇。

人前人後都非常恩愛嘅龔燁及熊若水，一直想生BB但未有實現，最近劇情就講到熊若水為求子而不惜人工受孕，但龔燁因一次意外，導致過去幾年嘅記憶全失，由好好先生變回乞人憎嘅賤精，仲要唔記得咗自己已經同熊若水已經結婚，更坦言自己係崇尚單身主義。二人由sweet到爆嘅夫妻變成陌路人，再加上龔燁嘅賤精性格回歸，搞到熊若水非常難過，兼喊晒口咁返熊家。

劇集出街後，張景淳及呂慧儀分別喺IG出PO，張景淳寫上：「今晚個集，龔水夫妻好sweet，然後龔燁失憶。接二連三避開危機，最後還是中蕉。整定要出意外。又或者若前面的意外成了任何一樣都不會中蕉。整定要出意外。」及「今晚個集消失的愛人。如果記憶消失了，人就跟隨消失？」而呂慧儀就寫上：「我躺病床你微笑，你躺病床我在哭。到底發生什麼事？當一切回歸原點。今晚龔水。」、「醒返，點都好過唔醒嘅。。。之但係。。。你哋聽晚再睇啦。。。無咩我匿埋喊吓先喇！」及「努力盡力用盡想得到的方法，讓你記起這些年觀眾們都記得的我們，有血有淚再添些汗水是必須的。。。之但係。。。龔燁流著賤精的血 我諗要返啲血清素 會疲累但還好有熊家撐我 其實幕後們都好給力外景真係好熱 Kenny導演很贊Sapphire助導很周到拍得很開心無咩事我又返去喊吓先喇。。。。。。」

雖然唔少網民留言大讚張景淳及呂慧儀表現出色，例如「係久違了的虐心情節，Stanley 同蟹蟹都發揮得好好。」、「好好睇啊。雖然傷感但係演得好好」、「係久違了的虐心情節，Stanley 同蟹蟹都發揮得好好。」、「無論賤精龔或寵妻龔，你都演繹得好好」、「你演嘅死賤精真係好抵死，你發揮得好好仲有笑位😂 不過都係快啲變返愛妻號啦，掛住sweet嘅龔水」、「龔燁真係好賤精，你演繹得好好」及「睇到心痛死，但你們真係演得好好，一個錯鄂的傷心，一個賤精的抗拒。人無事就好，回憶，可以慢慢來！」等等。不過唔少網民對「龔水CP」嘅發展表示不滿，紛紛留言表示傷心及鬧爆編劇，例如「龔燁唔好玩啦！乖！你唔記得wifey, 唔止水水，我哋都好傷心㗎」、「心痛水水啊⋯⋯龔生你可唔可以快啲恢復記憶」、「你地既愛情路真係曲折離奇 但一定可以排除萬難一齊返！加油啊龔水！」、「點解要咁對龔水」、「個劇情咩事呀？2023年啦仲跌到失憶，係咪已經冇晒創意？」、「叫個編劇出嚟！獲獲都係咁，成日要啲女主角喊到眼都腫哂！出嚟！」、「編劇咩事呀做咩要掛拆散你地 我要龔水戀呀」、「其實佢係咪又要離開劇組，先至鋪排一個咁嘅劇情，但係要至於咁樣咩？」及「編劇技窮到要玩失憶」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！