愛回家｜「熊心如」蘇韻姿多次傳被雪藏 入行8年今IG出PO證實離巢TVB

蘇韻姿（Andrea）憑TVB處境劇《愛·回家之開心速遞》「紅衫魚」熊心如一角成功入屋，原本有望與飾演風少嘅陳浚霆組成CP，但疑因工作態度問題未有改善而遭雪藏，上年年初劇情交代熊心如要跟前男友朱天梯（梁証嘉飾）到歐洲視察廠房離開香港，之後就再冇喺《愛·回家》出現。近日就傳出蘇韻姿離開TVB嘅消息，去到今日佢就喺社交網站出PO承認離巢。

2016年參選港姐入行嘅蘇韻姿，好快就加入《愛·回家之開心速遞》劇組，仲成功憑角色連續三年獲提名《萬千星輝頒獎典禮》「最佳女配角」及入圍兩次「飛躍進步女藝員」。蘇韻姿喺上年年中疑似成功解凍，開始出席活動及拍攝《非份之罪》及《黑色月光》等劇集。之前每當被問到幾時「回家」嘅時候，蘇韻姿都話等公司安排，後來佢已經轉口風，表示專注好目前工作，之後嘅嘢隨緣。去到近日，佢分享拍攝《黑色月光》嘅心情，但同一時間就傳出佢離開TVB嘅消息，除咗TVB官網已經將佢除名之外，佢嘅IG亦唔見有任何TVB經理人聯絡資料。

去到今日中午，蘇韻姿喺社交網站宣布離開TVB，並多謝TVB高層及《愛·回家》嘅熊家人：「依家係時候要跳出自己嘅舒適圈，接受新嘅挑戰啦。 不經不覺嚟咗香港八年，我已經成長咗好多，學到好多嘢。喺呢一度遇到好多錫我嘅人，實在係好幸運。 首先要多謝珍姐，喺我一個人嚟到香港嘅時候，俾機會我演熊心如，令到我喺香港都可以有一個家。亦都令到多左人認識我、有不同嘅工作，學到好多中文。多謝您咁多年嘅教導栽培。我會好好緊記你教我嘅一切。 多謝樂小姐，由選美到入行，一路都好照顧住我，教我點樣做好一個藝人。仲有Management嘅同事，多謝你哋一直嘅照顧及幫忙，我會加倍努力！ 多謝志偉哥！ 你嘅指導，加上鼓勵，令到我發現自己可以有好多可能性。我會keep 住你俾我嘅正能量。 多謝監製祥哥！喺拍攝愛回家呢幾年嘅鼓勵、你對拍戲嘅熱情、創作力，有直啟發我，真係好榮幸能夠同你合作！ 多謝監製佳導，俾個好好嘅機會我參與黑色月光，令到我見識多咗，學咗好多嘢，非常期待套劇播出！ 仲有好多謝俾機會我嘅綜藝監製們，我知道自己嘅經驗少，所以感激你哋信任，俾我去嘗試不同嘅工作！ 多謝熊家人，冇家人喺香港嘅我，感恩有你哋就有家嘅感覺。 最後要多謝關心同錫我嘅台前幕後朋友仔！等緊埋位，或者收工嘅時候都會同大家一齊傾偈。我會記住一齊渡過過嘅美好時光！ 相信喺未來大家一定能夠再遇到，亦都想藉呢個機會衷心祝福所有朋友，能夠在自己嘅舞台上發光發亮。」

呢個PO一出，唔少網民紛紛留言支持及叫佢加油，例如「新工作新開始，Andrea 加油」、「Hope all the best to you 真的唔捨得你」、「希望妳離巢後會有更好嘅發展‼️‼️‼️無論點都會一直支持妳」、「加油Andrea！希望你以後嘅發展會好順利 一定會支持你，雖然有啲唔捨得」、「去到邊發展都會繼續支持你! All the best Andrea!」及「紅杉魚魚 前程似錦！」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！