愛回家｜新片頭預告龍氏集團轉變大 古佩玲企正C位有望上位？

TVB處境劇《愛‧回家之開心速遞》近年有唔少主要演員離開劇組，並有新演員及新角色加入，日前一眾演員就齊集為劇集拍攝新片頭及全新主題曲《這個家》MV，並將於7月8日首播，雖然未有宣布之後嘅劇情走向，但從有份參與嘅演員亦估到大約發展？

《愛‧回家之開心速遞》由2017年播出至今已第2,323集（截至昨晚7月3日），而對上一次片頭首播日期已經係2021年8月16日，TVB事隔3年安排咗25位演員參與今次嘅新片頭拍攝，包括劉丹、單立文、湯盈盈、滕麗名、呂慧儀、周嘉洛、古佩玲、張景淳、羅樂林、蘇恩磁、樊亦敏、何晉樂、陳浚霆、林淑敏、歐瑞偉、許家傑、李偉健、林漪娸、吳偉豪、楊明、莊思明、袁文傑、姚瑩瑩、沈可欣及何芷姍，眾人載歌載舞逾十小時。

新片頭除咗有金城安（周嘉洛飾）和朱凌凌（吳偉豪飾）出現，比較明顯嘅係龍氏集團嘅轉變，由於二房龍力士（鄭世豪飾）和雷珍妮（陳偉琪飾）離巢TVB，因而剩下二太佘秀琴（蘇恩磁飾）一人；其中一幕25人大畫，蘇恩磁只被安排企喺最後第四排嘅最邊位，反觀三太白天娥（樊亦敏飾）則與大龍生（羅樂林飾）被安排企喺第二排，與熊樹根（劉丹飾）及熊樹仁（單立文飾）同排，兩者比較下，估計未來戲份會落喺樊亦敏身上比較多，近日劇情亦講到三太兒子龍舟（何晉樂飾）亦加入接龍，雖然唔少網民都表示對造型失望，而何晉樂嘅演技亦備受批評，但估計何晉樂嘅戲份都唔少。另外，租客申瑞素（古佩玲飾）亦由原本靠邊位置，轉而企正C位，可見極受重視，加上與風少（陳浚霆飾）呢對CP受觀眾喜愛，關係亦漸漸明朗化，相信佢嘅戲份都會變多。

主題曲方面，劇集由播出至今共有4首，包括第1至224集為純音樂《Latin Soul Strut》、第225至605集黃心穎主唱嘅《在心中》、第606至1326集眾演員主唱嘅《開心速遞》及JW王灝兒主唱嘅《愛心灌溉》，歌曲亦由第1327集沿用至今。對於全新主題曲《這個家》，監製韋晴未有透露主唱歌手，但就指歌曲非常洗腦及動聽，而網上有傳主唱為姚焯菲。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！