愛回家｜群姐根叔神還原何伯新何太好搞笑 網民：真係抽水抽到盡

TVB處境劇《愛·回家之開心速遞》劇情輕鬆搞笑，不時將唔同社會時事或熱話加入到劇本創作中，噚晚（19日）劇集繼續發揮玩嘢本色，將何伯與新何太事件及金句放喺劇情之中，一班網民睇到都話笑到肚痛。

何伯與新何太自從被《東張西望》報道後成為城中熱話，唔少《愛·回家》劇迷一直都希望編劇可以將何伯與新何太事件放喺劇情之中，劇組上月終於加入「鵝太」一角，喺噚晚大家終於可以睇到「群姐」許思敏扮鵝太嘅場面啦！噚晚劇情就講到「群姐」兒子「群腳仔」因炒燶股票而欠債，仲話要尋死，群姐為咗個仔不惜抄足鵝太一身珠光寶氣嘅打扮，帶靚湯去接近身邊嘅老年男人，但佳叔（鍾志光飾）及大龍生（羅樂林飾）等人都拒絕，最後搵到根叔（劉丹飾），佢飲完靚湯仲話「我一飲完你啲湯，搞到我周身㷫烚烚，而家我『發發』聲呀，我勁過好多後生仔呀！」另外，群姐問根叔有冇人介紹俾佢，根叔表示「啲咁好嘅嘢，與其益人哋，不如俾我用呀？」

之後，根叔打算投資俾群姐搞飲食生意，仲計劃拎出銀行嘅定期存款。根叔女兒獲銀行經理通知，並偷偷將根叔戶口內嘅錢轉走。熊家人返到屋企後，群姐已經登堂入室，摸緊根叔大髀。當根叔被問到定期存款原因時，佢先話讓群姐搞餐飲生意，之後群姐講嘢突然有口音話：「我會睇住啲開支嚟做㗎喇，試吓睇吓得唔得先囉」及「我同佢發生咗啲關係，我俾咗肉體佢」，根叔更話過幾日同群姐去註冊。群姐再話「我發誓，如果我呃佢錢，我呢一世都冇發達，呢個係我最大理想嚟。」不過冇幾耐之後，群姐發覺根叔冇錢，所以打算搵新目標昌叔（陳勉良飾）夾錢做生意。群姐同根叔喺初戀Cafe發生爭執，二人其實只係打算用秘方做補關節湯包生意。至於佢點解會有口音，原來佢成日同老闆談生意而被影響。

劇集出街後，唔少網民紛紛留言大讚好好笑及神似，例如「頂唔緊 真係好好笑」、「今集真心正 勁多抽水位」、「真好搞笑 愛回家演員每位做得非常好！」、「群姐突然有鄉音超爆笑」、「今集真係好搞笑！勁搞笑！正到爆啊！真係抽水抽到盡」、「群姐扮何太又扮得幾似」、「抽到水塘都乾」、「今集肯定年度10大」、「笑死」、「群姐鄉音扮得幾好」及「還原得咁神似既」等等；不過亦有網民認為編劇冇創意及事件已經過氣，留言話「仲玩何生何太呢單 煩唔煩d呀」、「完全係抄冇創意」、「照抄 河馬單嘢過氣啦」、「冇院兆祥演得咁盞鬼」、「抄到十足」及「好尷 仲抄緊」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！