憑《反黑路人甲》霸氣蔣家大小姐人氣急升 賴慰玲不做怪獸家長俾仔仔自由發展

無綫劇集《反黑路人甲》上星期五播出大結局，賴慰玲（Winki）喺劇中飾演蔣家大小姐蔣千霞，Winki成功將呢個霸氣又強悍嘅角色發揮得淋漓盡致，而佢同臥底張振朗嗰段情更深受觀眾喜愛，呢套戲可以話係佢事業上一大突破。

現年34歲嘅賴慰玲演藝學院畢業後，成為舞台劇演員及電台節目主持人。2013年佢由舞台劇跳入電視圈，喺《女人俱樂部》飾演少女版許珍妮被前輩黃秋生大讚佢好戲，更被封「小鄭裕玲」。之後，佢陸續參與唔少無綫劇集拍攝，例如《殭》丘玲梅、《棟仁的時光》丘茵茵及《機場特警》曾曉晨等等，今次憑《反黑路人甲》人氣急升。

至於感情方面，賴慰玲喺2017年同拍拖多年嘅舞台劇演員梁子峰結婚，之後生咗個仔梁進也（Marat），雖然要照顧仔仔，但賴慰玲未有放棄工作，佢認為家庭跟事業都係人生一部份，兩者一定要並存，佢而家可以做到家庭及事業都取得平衡。

而家佢仔仔已經兩歲半，賴慰玲仲不時喺社交網站分享同囝囝嘅生活點滴。Winki有自己一套教仔方法，佢認為要盡量令小朋友有自己發展嘅空間。所以佢兩公婆冇執著校網好嘅地區，反而選擇居住喺郊區，咁樣可以俾多啲機會仔仔接觸大自然，又可以了解城市以外嘅生活。Winki又話會比仔仔自由發展，教曉佢做一個善良及勇敢嘅人，佢嘅路就由佢自己去行。