【成功需苦幹】一條標題令蔡加讚被網友推爆 做馬主三隻馬都出事

汪詩詩汪圓圓父親汪國強早前因癌症逝世，家人尋日為汪國強喺中環聖約翰座堂舉行喪禮，身為女婿嘅甄子丹見記者時提到外父患癌一段日子，仍然積極面對，形容佢係一個戰士。汪圓圓老公蔡加讚亦有到場，但係現身俾傳媒影完相之後就返回座堂，相當低調。

早幾年蔡加讚因為一輯受訪相而成為網路紅人，仲不時登上名人版。富二代嚟講，蔡加讚無咩負面新聞，不過歷年來都有唔少新聞同佢有關。

「成功需苦幹」變「成功需父幹」

2011年，當時25歲的蔡加讚接受訪問，講述自己創業經歷，內容少不免提到父親「玩具大王」蔡志明。呢篇訪問出街嘅標題係「成功需苦幹」，俾網友惡搞話應該叫做「成功需父幹」

二家姐自殺身亡

2003年7月，17歲嘅蔡加讚喺九肚山屋企，發現二家姐加穎於睡房衣帽間燒炭自殺身亡，終年26歲。事後有報導話，曾經喺美國讀書嘅加穎罹患抑鬱症多年。

做馬主 三匹愛駒相繼出事

唔少上等人都會做馬主，蔡加讚都唔例外，不過運氣認真麻麻！2017年9月，沙田馬場發生馬匹操練意外，一部用作俾馬匹踱步用嘅「行馬機」出現事故，造成馬匹一死八傷，蔡加讚同甄子丹合夥嘅「宇宙車神」受傷，本來戰蹟唔錯嘅愛駒傷癒後表現大不如前。另外兩匹愛駒之後因傷分別要退役及人道毀滅。

娶汪圓圓搞世紀婚禮

蔡加讚同女友汪圓圓拍拖2年幾，2013年底結婚，據知喜事無開支上限！婚宴喺會展筵開160席，到場嘉賓名人匯聚，時任港澳特首梁振英同崔世安都有到場，難怪被稱為世紀婚禮。