6大高質扒房推介 歐式古典宮廷風、尖沙咀酒店傳統扒房

又就嚟到年尾多節日慶祝嘅日子啦，今朝搜羅咗六間優質扒房畀大家，到節日、生日或者紀念日都唔使頭痕啦～更可以用 OpenRice 網上訂座服務 Book 定枱，賺 Rice Dollars 當錢使！

瑰麗歐式古典宮廷風 La Rosabelle Bar & Grill

以歐式古典宮廷風為設計軸心，牆壁掛上經典油畫、垂墜水晶吊燈、古銅鏡、古典時鐘等，令客人一行入餐廳就感受到滿滿中古世紀歐洲風味。首推 Surf & Turf，以經 21 日乾式熟成嘅美國安格斯 Prime 級西冷牛扒搭配波士頓龍蝦，牛扒一入口好 Juicy、充滿香氣，龍蝦都鮮味滿滿。餐廳不定時會有現場音樂表演，主廳亦設有英式桌球枱，等客人可以隨興同朋友玩一場「貴族運動」！

酒店經典扒房 The Steak House

呢間高級經典扒房無論喺前身洲際酒店時期、定係而家於重開無耐嘅麗晶酒店都一樣咁有人氣～窗邊可以望到無敵海景，燈光暗暗地幾有情調。店內設有熟成肉櫃同酒櫃，一入座就會端出精緻嘅木盒畀大家揀刀食牛扒，好有儀式感。供應意大利、西班牙、美國各地精選較上乘嘅牛肉部位，仲有澳州 M9 和牛、日本和牛同韓牛，好似澳洲 M9 和牛 Flat iron，滿滿油脂香；美國 Super Prime Beef 食落有焦香同濃濃肉香，加錢仲有得享用 Free Flow 沙律吧。

愛荷華州優質黑安格斯肉眼扒 Chef’s Cuts Restaurant & Bakery

位於啟德全新地標 Airside 嘅旗艦店，佔地約 5,000 平方呎，環境綠意盎然、令人感覺舒適。招牌名物係呢款愛荷華州優質黑安格斯肉眼扒，完美展現大理石花紋及最佳嘅脂肪分佈，經過長達 21 日嘅乾式熟成後，令其本身嘅天然酵素及微生物同時分解肌肉纖維，再將多餘脂肪切走，肉質軟腍又充滿牛味。頭盤方面推介焗龍蝦芝士通心粉及墨西哥香料焗油甘魚鮫，店面門口位置更設有麵包店 Sour Dough，所有麵包歡迎外賣或堂食。

佛羅倫斯小餐館 Associazione Chianti

以意大利佛羅倫斯小餐館為靈感，供應一系列富鄉村風味嘅意大利菜式，餐廳內特設乾式熟成機，將美國黑安格斯牛扒喺店內熟成。主打一定係佢哋嘅 BISTECCA ALLA FIORENTINA，即係 T 骨扒，選用嚟自美國愛達荷州牧場嘅 Prime Cuts 黑安格斯牛，乾式熟成後加秘製香料醃製再燒烤，香氣濃厚。T骨牛扒更可以同時享受到西冷同牛柳兩個部位，前者有咬口後者就軟腍啲。呢塊牛扒厚度十足有成 1kg，啱晒同朋友分享！

德州式煙燻扒房 Smokehouse Bar & Grill

想有點新意思嘅可以試吓呢間主打煙燻肉類嘅扒房，以優質嘅進口肉類配上傳統煙燻慢煮烹調技術，絕對令你驚喜。招牌菜式牛胸肉，配以辣椒粉及芫荽籽等以乾醃形式進行醃製，特別選擇櫸木進行煙燻慢煮，其木質帶有溫和特性，能令肉類帶出最自然風味，牛胸肉烹調過程用咗30小時，誠意之作。慢煮24小時煙燻慢煮牛肋骨都值得一試，肉質與脂肪比例啱啱好，惹味可口且肉質嫩滑。

小酒館概念法式扒房 The Grill Room

呢間法式扒房日前嘅銅鑼灣店今年年中同區重開，以座落於鬧市中嘅現代小酒館為概念，由開放式吧枱、梳化卡位到 Private Dining Room 都有得揀。招牌菜係 16 安士 USDA 安格斯肉眼牛扒，牛肉香伴隨炭香，再加上餐廳三款秘製醬汁：牛肉原汁、牛肝菌牛肉原汁、法式蛋黃醬，同三款配菜：烤蘆筍配烏魚子碎、脆新薯配香草檸檬忌廉汁、羅文生菜苗沙律，多重享受！香煎慢煮牛柳伴日本南瓜杏鮑菇配牛肝菌牛肉原汁都值得一試。

文: Yanica
編: Cathy.H