拍拖4年力抗「甩拖咒」 搣「有錢女」標籤 陳楨怡：我唔係唔使做

港姐亞軍陳楨怡從小衣食無憂，有樣有身材兼於外國留學，絕對是「人生勝利組」！雖然有同母異父的家姐及哥哥，她仍受萬千寵愛，但直言被「富家女」標籤所累，要比別人付出更多！

打從港姐面試日已被喻為「女版金宇彬」的陳楨怡（Celina），最終愈戰愈勇，更當選亞軍。卸任在即，她一方面為跳出港姐框框而高興，另一方面又因離開舒適圈而緊張。最近她被委派擔任兒童節目《Think Big天地》主持，她接受本報專訪時，自爆曾到小學做一日客席老師，從中學習與小朋友相處，並同時上演技課：「選完之後一直有上堂，因為之後可能有機會拍劇，要裝備好自己。我都知高度係障礙，我可以唔着高踭鞋。（邊位前輩係你嘅奮鬥對象？）師姐佘詩曼同胡杏兒，想好似佢哋咁成功！」

同母異父家姐感情好

被指為「富二代」的她，有一對同母異父的家姐及哥哥，她笑說：「我係呢個爸爸、媽媽親生嘅，家姐同哥哥先唔係，不過佢哋都好錫我。家姐大我十幾年，仲長氣過我媽咪，我哋好Close，有咩問題都會搵佢傾訴，冇秘密。」她又澄清：「我唔係富二代，真係出自普通家庭，感恩父母畀我去英國讀書，但我都要好努力。爸爸係印尼華僑，唔係富商。」被標籤為「有錢女」，令她的成長路比別人更艱難：「我唔係唔使做，反而要更努力證明自己，所以不斷增值，學跳舞、豎琴、健身同做瑜伽。」

唔Mind叫「女版金宇彬」

談到港姐大多難逃甩拖「魔咒」，她揚言對男友相當有信心：「我哋拍拖4年，好穩定，外間成日話娛樂圈好多誘惑，但我哋唔係好擔心。（公司唔畀高調？）本身都低調，社交網都冇甜蜜相。（點維繫感情？）好似普通情侶咁，都會出街食飯嘅。」成為公眾人物後，舉手投足都會被放大，Celina希望保持真我，但試過素顏出街仍被認出：「可能我單眼皮易認，都羨慕過大眼嘅女仔。（叫你『女版金宇彬』會唔開心？）一開始有少少，心諗點解會似一個男人，之後覺得『是但』，金宇彬都係一個靚仔吖！」