文凱婷翻唱《黑玻璃》遭網民與雲浩影Cloud比較：差好遠 好似啲學生唱卡拉ok

文凱婷（Aeren）2021年參加TVB選秀節目《聲夢傳奇》，其唱功未被網民認同，更被封「Aeren傳奇」，指每次佢都總可以矇混過關，入行後雖然無四小花發展得咁順利，但都獲安排唔同嘅工作機會，亦曾與林敏驄合唱劇集《下流上車族》主題曲《一家人》及推出派台歌《十秒限時》。之後，文凱婷被指疑似介入年長17歲唱歌老師湛耀東（Waye Cham）戀情，即使佢拒認第三者，表示與男朋友一齊前大家都係單身狀態，但形象仍下滑。日前，文凱婷於流行音樂節目《J Music》翻唱洪嘉豪作品《黑玻璃》，被網民狠批唱得差，仲拎佢同曾經都有Cover過《黑玻璃》嘅雲浩影作比較，指雲浩影完勝。

唔少網民睇完文凱婷演唱《黑玻璃》影片都指其表現唔太理想，又指佢唱到好似唱K咁款：「佢比賽果陣都知佢係唱得差架啦，完全冇期望佢會唱得好聽，果然冇令人失望」、「真係頂唔順，樣又麻麻地，唱又唔多掂⋯⋯我去聽返kaho先」、「唱k水平，chorus聽落有啲hea添」、「好重懶音」、「d（啲）字有d位 lur過晒d（啲）字，咬字不清」等等。雖然都有網民指聽得出文凱婷好有感情：「Aeren唱功唔係最好，但唱到好甜嘅感覺出黎」、「其實凱婷好明顯改緊唱法，請比啲時間佢」等等，但網民覺得始終輸畀雲浩影：「同cloud差好遠.. 好似啲學生唱卡拉ok 咬字唔清，堅唔好聽」。

反觀，雲浩影於4月ChillGOOD TV《Music Panda》翻唱《黑玻璃》廣受好評，被網民大讚靚聲之餘，更唱出與原版本唔同感覺，有網民更表示希望雲浩影版本嘅《黑玻璃》可以正式推出：「都係因為聽到這版本，再聽原版，Cloud的版本較sweet ，原版有d（啲）急 ～」、「呢個version 真係狂loop，我鍾意雲姨把聲」、「呢個版本聽咗堅有過百次，雲姨聲音好正」、「超好聽，好浪漫又sweet」、「繼衛蘭後，很喜愛的聲音」、「大愛，希望此版本可以正式推出」、「依個version仲正」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！