文化博物館「殺館」張國榮、梅艷芳演藝珍藏無處容身 哥哥粉絲：而家擺明絕望

港府計劃將尖東科學館改建為介紹國家發展和成就的專館，現有科學館會在沙田文化博物館重建，而文化博物館的藏品會在其他博物館整合和重置。文化博物館收藏了多位流行巨星的遺物，也曾辦過張國榮、梅艷芳的展覽。「殺館」引來不少迴響，尤其是流行巨星張國榮、梅艷芳的粉絲都有發聲，更表示感到灰暗與絕望。

率先發炮梅艷芳粉絲：唔單只係梅艷芳fans嘅損失，亦係香港文化嘅重大損失

文化博物館常設金庸、李小龍、張國榮、梅艷芳、粵曲、廣東歌及香港電影的歷史等展覽，紀錄了大量香港流行、娛樂文化的重要歷史。文化博物館的常設展覽「瞧潮香港60+」有展出梅艷芳舞台服飾。博物館曾舉辦「繼續寵愛・張國榮紀念展」，今年12月24日將舉辦《絕代芳華．梅艷芳》紀念展，想不到展覽未開始，已傳來殺館惡耗。

曾就文化博物館殺館一事，發聲明炮轟的IG專頁「Anita.mui_」 ，其90後版主亦回應Yahoo娛樂圈：「如果真係殺館係好可惜，唔單只係梅艷芳fans嘅損失，亦係香港文化嘅重大損失。香港文化博物館歷年嚟籌辦好多出色嘅展覽，記錄同介紹香港嘅文化，亦係少有將香港流行文化提升至歷史紀錄層面嘅博物館，係一個香港市民認識同回憶本地文化嘅好地方。」

至於館內存放的梅姐生前重要遺物，如今亦面臨四散：「作為梅艷芳嘅粉絲，的確好擔心如果文化博物館搬遷或者甚至係取消嘅話，梅艷芳嘅遺物重新安置喺唔同嘅博物館，就唔能夠統一保存，最後或者會令藏品四散。而冇咗文化博物館，亦唔清楚流行文化可以歸納喺現時邊個博物館嘅主題範圍裡面，前景係有啲灰暗。」

最後，他希望香港文化仍然有保留及傳承的地方：「我希望香港可以繼續有一個正規博物館專屬香港文化，無論係現址、遷館，定係起過新嘅都冇所謂，最重要係有一個咁嘅地方保留同傳承香港文化。」

張國榮粉絲：而家擺明絕望

曾於今年3月接受Yahoo娛樂圈訪問的「後榮迷」組織「All For L」，聞知文化博物館殺館，更以「絕望」來形容：「會好可惜，因為為哥哥及其他有份推動為香港流行文化嘅名人建設紀念館呢個議題其實都已經講左十幾年。之前文化博物館有呢個展既時候大家都有期望，話唔定有香港演藝文化展長擺，而家擺明絕望。」

至於哥哥的遺物與展品，又會否擔心無處展出？「會擔心既，不過陳太（前張國榮經理人陳淑芬）曾經講過話佢會搞相關既野，希望佢真係會有所作為。」

她們認為，推廣香港文化絕對可以幫助旅遊業，但如今政府的取態，就顯示了他們的想法：「香港文化作為香港發展史嘅重要一環，但政府從來都冇好好規劃過。不論係流行文化定係其他種類嘅文化，其實可以幫助旅遊發展。根本冇正式好好去規劃文化博物館，而家仲要將文化博物館成為其他博物館嘅附屬品，我覺得咁好可惜。希望香港仲有個地方可以展覽同記錄香港嘅流行文化。」