新作封面被IG刪走 素海霖有份演出音樂節 門票僅售出3成要告急

首位港產AV女優素海霖(繪麗奈)出道未夠一年，已經準備推出第4套作品。素海霖早前喺IG上載新作品封面，並留言叫大家訂購，仲話「劇情片真的來了」，引起唔少網民留言支持。封面中嘅素海霖着上白色超低胸背心，旁邊更寫上「廣東話講師」，似乎今次係扮演miss「貼身」教學生！

不過素海霖新作封面已消失於佢嘅IG，佢亦出post話「唔post la 又檢」，似乎係被平台或者用戶檢舉而要刪除。不過唔少網民都留言安慰，又叫素海霖「轉台」用其他社交平台。

但係「素海霖連環不幸事件」仲未完，早前本地音樂節「未來音樂祭」搵素海霖同獨立音樂人$ALTY CHICK 鹽焗雞及「抒情金屬樂隊」P.R.O.J.E.C.T. 9 跨界合作參與演出，本來相當有綽頭。不過未來音樂祭尋日出post表示要告急，因為「離未來音樂祭不足一個月，我們暫時只賣出不到三成的門票」。主辦單位又話「告急？唔敢。但唔告急？似乎已經沒有選擇了。自疫情開始，TONE Music 的我們一行人闖了一關又一關，在整個市道低迷的兩三年間上天確實待我們不薄，辦了不少演出，認識了不少好友，更重要是有你的支持，還實現了我們「膽粗粗」辦年度音樂頒獎禮的願望。這個『未來』都是機會，是突破，是屬於我們、屬於你們的時代。然而，正當我們以為新的時代要開始了，現實讓我們遇上從未遇過的難關」。有網友留言認為，音樂節銷情麻麻，同演出地點、陣容、票價以及不設座位嘅安排有關。

未來音樂祭由TONE MUSIC舉辦，由疫情時嘅網上音樂會演變成實體show，並舉行音樂頒獎禮等活動。今年主打演出單位有謝安琪、周國賢、台灣嘅韋禮安同安溥等，並有大批新一代歌手組合及獨立音樂單位參與。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！