新聞女王｜何依婷與佘詩曼互罵場口感人 空洞眼神令人心寒被激讚入戲

TVB台慶劇《新聞女王》將於本周五（22日）迎來兩小時大結局，女配角之一嘅何依婷日前（16日）於峇里完成婚禮後留在當地玩樂，但將會喺大結局當晚與一眾演員現身澳門齊齊睇劇。《新聞女王》劇情日前進入高潮，張家妍（李施嬅飾）開始黑化，搶新聞臨時改稿引導觀眾認為Slash（馬貫東飾）醉酒駕駛等等。前晚（19 日）播出一集，講到Slash留院搶救不治宣告身亡，徐曉薇（何依婷飾）出席完喪禮後到海邊企圖跳海自殺，但Man姐（佘詩曼飾）趕及阻止佢，當曉薇知道Man姐透過GPS定位追蹤到其位置，不但怒摑對方更展開激烈對罵，Man姐痛心鬧醒曉薇一段亦被觀眾激讚係全劇第一淚點；其後，劇情更出現大反擊。

曉薇破口大罵Man姐，表示死咗唔使再做任何人隻棋：「你明知前面係爛地，你有冇提醒過我，你仲一直逼我向前跑，你逼我幫你跑呀」Man姐則鬧醒曉薇：「我同你一樣，都係不停咁喺塊爛地度跑架咋，但我冇怨呀，因為我知自己為咩而努力，我係為咗我自己而跑，你一日唔搞清楚自己想要啲乜嘢，淨係望住個結果，完全唔enjoy跑嘅過程，你跑嚟都冇意思」、「唔好睇小嗰塊爛地，有邊棟樓唔喺個爛地度起出嚟」，最後叫曉薇學吓對自己好啲。鏡頭隨後播出曉薇笑著畫畫嘅畫面，當以為佢終於諗通去交辭職信予Man姐，Man姐驚訝曉薇提及昨日海邊一事，至知道原來Man姐從未踏足海邊，一切都係曉薇幻想出來，而佢送畀Man姐嘅畫更加係紅黑嘅恐怖圖畫。何依婷呢集嘅演出令人相當心寒，唔少觀眾表示曉薇其實係全劇最慘嘅人，大讚何依婷好入戲：「今次何依婷演技非常之衰格野蠻恐怖」、「何依婷做得好好」、「曉薇對住Man姐依段，何依婷做得好唔錯」、「呢套劇最難演係何依婷角色，中期開始演得唔錯」、「眼神空洞手足無措，很入戲」、「慢慢見佢進步，以新人計都幾好，戲份好重，加油」、「有進步，唔差架佢」、「曉微的角色，感情起伏好大的，邊個做都難，但我覺得何依婷越做越好，曉微的人生和經歷好唔容易，依婷係好大進步」、「開頭覺得麻麻地，但睇晒之後覺得佢又OK喎，呢個角色幾啱佢做，外型唔錯，又唔會話太高蓋過阿佘氣場」等等，成功洗底。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！