新聞女王｜佘詩曼霸氣演出展現視后功架 馬國明被指carry唔到角色 網民：馬明完全撐唔起

TVB台慶重頭劇《新聞女王》喺噚日（20日）首播，劇集卡士陣容華麗，除咗有闊別TVB劇集多年嘅視后佘詩曼做女一之外，仲有視帝馬國明、李施嬅、視帝譚俊彥、高海寧及何依婷等人主演。想知網民們睇完有咩感受，快啲轆落去睇下啦！

劇情緊湊刺激
《新聞女王》主要講述電視台新聞部勾心鬥角，喺噚晚劇情就講到巴士翻側意外，文慧心（佘詩曼飾）及梁景仁（馬國明飾）兩派為求爭奪公司資源，勢必搶得獨家消息。而喺意外現場嘅張家妍（李施嬅飾）就努力為意外做採訪，不過被許詩晴（高海寧飾）嘅短裙和煽情報道搶鏡。喺首集，劇集出現多個緊張刺激畫面，例如馬國明喺新聞報道時打算陷害佘詩曼，要佢講出近年嘅嚴重交通意外，而處變不驚嘅佢成功克服。唔少網民都大讚劇情緊湊刺激，及大製作，例如「幾有誠意」、「大製作」、「呢套野睇得出幾重皮」、「𦘦事現場直播迫真」及「好緊張明快」等等。

佘詩曼型格演出 展現視后功架
佘詩曼喺劇中飾演充滿霸氣嘅首席女主播「Man姐」文慧心，出名好演技嘅佢當然冇令大家失望，甚至有內地網民指她連眉毛都是戲，而佢嘅主播表情及tone亦幾可亂真，唔少網民大讚佢嘅型格演出，例如「呀蛇好正」、「d演技真係無得輸」、「蛇連個tone 都扮得似」、「把聲係幾似新聞報道」、「阿佘係有啲料到 岩岩啲氣場 feel到馬明唔係咁夠班接」、「把聲扮得幾似主播聲 Man姐真係由雞仔聲變女王」、「阿佘真係好掂」、「阿佘報新聞啲講嘢節奏同埋啲tone都真係學到足真正嘅主播，好似真係睇緊新聞咁」及「Man 姐真係有型有格，係阿佘先可以 Carry 到」等等。

李施嬅入型入格 好charm
李施嬅就飾演好有態度嘅午間新聞主播張家妍，喺噚晚嗰集佢似足跑現場嘅真記者，唔少網民都留言大讚佢演技到位又有型，例如「李施嬅跑新聞真係似媒體，好專業。」「李施嬅演得好自然，support」、「好睇，Selena好charm」 、「好睇，施嬅好型。」「李施嬅好有型喔。」、「李施嬅角色好正」及「施華（嬅）姐其實係演得最自然個位」等等。

馬國明carry唔到角色
馬國明喺劇中飾演首席男主播「George」梁景仁，經常與Man姐競爭，喺噚晚嗰集亦有出現惡鬥場面，不過唔少網民都認為佢撐唔起角色，留言話「馬明成個傻仔咁」「馬明真係好戲屎 無啦啦暴走 頭先明明個角色設定係冷靜陰濕X，無啦啦變左暴躁X」、「馬明完全撐唔起」、「馬明完全做唔到個角色 木口木面咁」及「馬國明套套都係果個呆樣」等等。

多靚女藝員助陣
劇集雲集唔少靚女藝員，首集已經有郭柏妍、高海寧、何依婷及陳曉華，嚟緊陸續出場嘅仲有王敏奕、鄺潔楹、陳楨怡及何沛珈等等，所以有一定嘅吸引程度，難怪網民們都留言話「幾多靚女 套野」及「套野咁多後生女」等等。另外，網民亦有留意佢哋嘅演技，當中何依婷及陳曉華就被指演技有進步，例如「Regina好似好戲左」、「何依婷好正」、「陳曉華演技進步咗」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！