日劇《如果30歲還是處男,似乎就能成為魔法師》爆紅 重溫港劇hehe味濃男男CP

·5 分鐘文章
《如果30歲還是處男,似乎就能成為魔法師》劇照
《如果30歲還是處男,似乎就能成為魔法師》劇照

由同名漫畫改編嘅日劇《如果30歲還是處男,似乎就能成為魔法師》,搵嚟赤楚衛二及町田啟太主演。劇集自10月初開播就爆紅,至今仍話題不斷,除咗劇集有唔少浪漫又搞笑嘅情節之外,兩位靚仔男主角CP感爆晒標,成功俘虜唔少女觀眾心。其實香港嘅劇集過往都有唔少hehe味濃嘅男男CP,而家就同大家一齊重溫吓啦!

《愛·回家之開心速遞》截圖
《愛·回家之開心速遞》截圖

無綫劇集《愛·回家之開心速遞》金城安 & 朱凌凌(周嘉洛 & 吳偉豪 飾)
「安凌CP」安仔(周嘉洛飾)同朱凌凌(吳偉豪飾)係大學同學兼好朋友,佢哋經常出雙入對,分分鐘多過安仔同女朋友Bonnie(林凱恩飾)。佢哋有時都會鬧交,不過佢哋嘅關係充滿愛,所以最終都會因關心而原諒大家,真係打風都打唔甩呀!

《愛·回家之開心速遞》截圖
《愛·回家之開心速遞》截圖

無綫劇集《愛·回家之開心速遞》KC & Terry(歐瑞偉 & 李偉健 飾)
講起男男CP,點可以唔提KC (歐瑞偉飾)& Terry(李偉健飾)呢?佢哋由《愛·回家》師徒關係到《愛·回家之開心速遞》親戚關係都勁有火花,喺《愛·回家之開心速遞》中佢哋兩舅甥嘅相處方式有搞笑又有愛,期間都有唔少經典情節,好似惡搞電影《格雷的五十道陰影》大玩男男SM、惡搞日劇《大叔的愛》KC趁Terry沖涼時親吻佢額頭一下、扮鐘點工人去照顧Terry等等,唔少觀眾都好鍾意佢哋嘅互動。

《誇世代》劇照
《誇世代》劇照

無綫劇集《誇世代》Mike & 大頭B(陳豪 & 森美 飾)
剛陽味勁濃嘅陳豪同森美,雖然點睇都唔似hehe,不過佢哋喺《誇世代》中有唔少曖昧鏡頭。劇中有好多佢哋默契而互望嘅一幕,就令到佢地產生強烈化學作用,不過最令人印象深刻嘅一定係訂婚儀式「搶婚」,期間大頭B一臉冧笑,之後仲跳上Mike架電單車離開。

《平安谷之詭谷傳說》劇照
《平安谷之詭谷傳說》劇照

無綫劇集《平安谷之詭谷傳說》陸金谷 & 烏公公(劉江 & 李國麟 飾)
村長谷爺(劉江飾)霸氣又嚴肅,所有人都要敬他三分,只有烏公公(李國麟飾)先可以好親切咁叫佢做「谷谷」。雖然谷爺係睇錢份上先幫佢搵老婆,不過佢哋嘅相處方式好曖昧,例如摸手仔、托下巴、掃背及打籮柚等等。呢段136歲嘅HeHe情有少少重口味,不過都幾頂癮!

《大帥哥》截圖
《大帥哥》截圖

無綫劇集《大帥哥》佘南 & 滿仔(古明華 & 黄耀煌 飾)
佘南(古明華飾)唔會好似其他軍閥咁攬女人,反而經常與部下滿仔(黄耀煌飾)出雙入對。喺劇集開頭,旅長們被要求送另一半俾狄奇(張衛健飾)做姨太太,佘南當時迫於無奈將滿仔送出去,好彩狄奇唔要,滿仔先可以返去佢身邊。之後佘南對羅義(徐榮飾)表示好欣賞讚賞,仲開始冷落滿仔,搞到佢好妒忌,劇情相當搞笑。

《反黑路人甲》劇照
《反黑路人甲》劇照

無綫劇集《反黑路人甲》張細倫 & 高彬 (王浩信 & 張振朗 飾)
王浩信飾演嘅張細倫真係豔福無邊,有多個女人為佢爭風吃醋,不過最搶眼嘅都係佢同高彬(張振朗飾)。喺劇中佢哋有唔少hehe情節,例如喺陸秋(朱敏瀚飾)面前深情對望兼十指緊扣、扮《天若有情》緊緊相擁坐電單車及為脫離臥底行動喺車廂內激情咀嘴等等。

《踩過界》截圖
《踩過界》截圖

無綫劇集《踩過界》盲俠 & GoGo(王浩信 & 張振朗 飾)
盲俠(王浩信飾)及GoGo(張振朗飾)係同居生活,加上佢哋嘅hehe味濃對白,真係好有曖昧嘅感覺,不過大家最印象深刻嘅一定係GoGo錫盲俠頸部。續集《踩過界II》就嚟播出,唔知佢哋嘅情感關係會唔會更進一步呢?

《教束》劇照
《教束》劇照

ViuTV劇集《教束》莊子 & 鄧學謙(周漢寧 & 唐浩然 飾)
以校園為題材嘅《教束》,主要講述地區名校馬修書院嘅內部鬥爭、探討精英學生壟斷等等嘅弊病,劇集深受觀眾喜愛。劇集有一班實力演員助陣,不過最突出嘅係莊子(周漢寧飾)和鄧學謙(唐浩然飾)嘅一段撲朔迷離嘅hehe情,期間鄧學謙仲試過「壁咚」莊子,真係睇到大家個心卜卜跳呀!

《三一如三》截圖
《三一如三》截圖

ViuTV劇集《三一如三》宗國 & King(黃奕晨 & 陳安立 飾 )
《三一如三》上演大膽劇情,劇中講述宗國(黃奕晨飾)暗戀健身教練king(陳安立飾),佢哋喺做完運動後沖涼,肉帛相見期間,宗國曖昧暗示但被king一口拒絕。

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能