早餐/下午茶方便之選 新界區5間香噴噴麵包小店

·3 分鐘文章

呢排疫情咁嚴峻,好多人都會減少喺街外進食。以往返工前坐喺茶記或快餐店,食件蛋治飲杯奶茶先返工嘅日子,或者要停一停喇。如果唔夠時間喺屋企煮加食埋個早餐先出門口嘅話,快快手喺麵包店買個包都可以。除咗各大知名嘅連鎖集團麵包店外,各區都有唔少麵包小店呢。

荃灣 貝嘉餅屋

 圖:lam.yaan、852hkfood
圖:lam.yaan、852hkfood

位於荃灣同大窩口交界嘅呢間餅屋,幾款迷你撻相當受街坊歡迎,主要係啲餡蓉夠高夠飽滿。紫薯味微甜幼滑,栗子香口,仲有粒粒栗子蓉咬得到。另外仲有款迷你芝士撻,撻底有朱古力,芝士味淡香。重點係,全部街坊價呀,夠親民。買幾個做下午茶請埋同事食都唔會肉赤。

元朗 寶城餅店

圖:HoneyZoe、bageladdiction
圖:HoneyZoe、bageladdiction

元朗呢間餅店都開咗好多年喇,最多人鍾意食佢嘅蛋撻,甚至被部分食客譽為「元朗最好食嘅蛋撻」。一爐爐新鮮出爐嘅蛋撻香噴噴,蛋漿有蛋香味得嚟又唔會太甜,曲奇皮香脆,牛油味濃,難怪個個都食過番尋味。舖頭每朝5點半就開門,買做早餐就啱晒。

馬鞍山 Casa Bakery

 圖:KaKa522、BoBo_Chow926
圖:KaKa522、BoBo_Chow926

呢間舖頭有幾張枱仔做堂食,亦有多款新款麵包,好似薑汁蕃薯包咁嘅選擇。如果想要熱食,或者食包都食得好似豐富啲嘅,可以諗諗蟹棒配松葉蟹黃醬或者黑松露醬意大利雜菌雙重芝士吐司,前者有大大條蟹棒,後者松露夠香兼可以玩到拉絲!

元朗 麥田緣

 圖:Mirurinw、霖迪
圖:Mirurinw、霖迪

唔少麵包控都會慕名去到元朗呢間麵包店度買包,唔止因為佢哋多款,更加係因為佢哋嘅麵包,大部分都係無蛋無奶同無油,健康啲,素食朋友都啱食。最多人鍾意就係朱古力卡門啦,仲有普羅旺斯蘋果都唔錯,餡多味甜。最新推出嘅有「蜜觀音」,由龍眼蜂蜜、鐵觀音、抹茶粉製成,茶香中帶甜,不過抹茶味就可能冇相像中咁濃。但利申,呢間啲包唔平啊。

馬鞍山 Motto Bakery

圖:gloria1023、kotoya0416
圖:gloria1023、kotoya0416

新開冇耐嘅呢間麵包小店,裝修靚靚仔仔,傳統同創新嘅麵包都有,例如而家已經唔多地方搵到嘅紅豆沙翁,或者潮流大熱綠茶紅豆麻糬都同樣喺麵包架上搵到。前者外脆內軟,香香甜甜;後者煙韌軟糯。每朝6點開門,返工前快手買個包做早餐都得。

文:Kar