是日噏day：初四咁嘅樣 你又有無分享？

放假嘅心情，總係伴隨住對復工日子來臨嘅厭惡。正所謂「初四咁嘅樣」，返工固然乞人憎，但新正頭開工日嘅騎呢公司文化，亦都係戲肉嘅一部份。作為打工仔嘅你，梗有一件中過：

1、簽收公司利是
好多公司都有派發公司利是嘅傳統，而好多時高高在上嘅大腦細，唔會得閒逐個員工同你派，變成係秘書小姐拎住一張人���紙，俾完封利是你，就要你喺上面簽收，有時仲係要你喺佢張枱排長龍嗰隻。個感覺似咩呢？確實係有啲似監獄風雲，排隊攞橙。最弊係，得個$40你都夠膽叫我排餐死？

2、公公組隊面聖扮馬騮
公司平時總係有啲人，嘢又唔做，一日到黑係腦細面前，擦鞋擦到放工。而呢類宦官公公，就最興係新年call你組隊，衝入腦細房做馬騮戲，想你幫手扮花扮樹講恭賀說話冧腦細。喂！擦鞋係你性格姐，關我鬼事？你唔駛預我㗎喎！

3、上司一臉期待你講賀年說話
一年364日上司嘅眼神都唔會咁樣，但唯獨今日，佢會眼甘甘咁望住你，等你主動過去佢講恭賀說話，然後俾利是你時，不忘么你兩句：「今年俾心機啦，唔好再好似上年咁⋯⋯（下刪100字）」

4、等時辰開電腦
好多公司都有睇風水嘅習慣，新年開工會夾時辰，等夠鐘先俾你開電腦做嘢。但問題係，我開唔到電腦，你咁早叫我返工，坐係度幾個鐘眼光光，為咩呢吓？

5、上司問你攞利是
我明白，你仲未結婚並唔係咩錯事；不過我結咗婚，你係我上司而未結婚，但又問我攞利是，我只會想比條毛你，再外加一隻堅定嘅中指，向你唔知喺邊度嚟嘅勇氣致敬。

6、著咩色衫又關你事
沉色衫，係我衣櫃入面嘅主菜。着一身素色，黎姿當年都讚係最自然嘅服飾亦都唔覺係平淡，腦細因咩事問我做咩今日着都死氣沉沉呢？你份人工，包我着到成個流動利是封咁返工嘅咩？

辦公室新年怪事應該唔止咁少，來來來，趁新年流流，一齊（唔）開心些牙吓！