是日噏day：如果波霸餐廳無波霸

當早幾日見到，中環A&F店即將結業，
第一個反應係：「謝天謝地！終於都執啦！」

如果要去蘭桂坊嗰頭而搭地鐵嘅人，應該好明白喺「D出口」出，無論轉左定轉右，A&F嗰陣「香」水味，根本係避無可避無需再避。關於即將可以唔使再聞到呢陣唔知點解會有人覺得香嘅臭味，我感到極度欣喜。

除咗呢陣臭味，A&F仲有冇咩乞我憎嘅呢？有！但唔係討厭佢哋用大隻仔model（其實我係覺得幾好睇嘅），最大嘅問題，真係出係product度。

原諒我一世人，只係入過A&F一次咁大把，就係啱啱開鋪，跟風走咗入去行一轉。但去過一次，真係去唔到第二次，因為我堅信，就好似一間餐廳難食如明將嘅，你係唔需要間唔時走去再食多次試下佢仲有冇屎咁難食。

第一次行入去A&F，除咗覺得臭之外，就係覺得環境好黑。咁當然，好多時裝店都係好黑，黑唔係最大罪。最大問題係，漆黑之中你見到一款衫display緊，當你行去下一個貨架時，你會覺得同上一件根本係同一個款。

摸黑繼續前行的話，你直頭會懷疑入咗結界，因為每款衫都好鬼似樣——緊身衫，心口有品牌個名大大隻咁放喺件衫上面，要直至行到一件，個款真係叫做有啲啲唔同嗰寥寥數款時，先敢肯定自己唔係蕩失路。

所以確實唔明，A&F大量除咗印logo還是印logo嘅衫，所謂嘅「設計」，究竟係設計左啲咩。當呢個品牌出品嘅衫，絕大部份根本冇設計可言，又唔靚喎。其實係憑咩賣到咁貴呢下？

其實我每次見到朋友着印着大大隻A&F logo嘅緊身T恤，我都會不禁揶揄一番：「其實點解你會買？」
聽得最多嘅答案就係——「我覺得……幾好睇。」
追問落去，其實好多都交唔出一個具體原因，因為說穿了，所謂嘅好睇，其實係用極完美體態模特兒堆砌出嚟嘅虛無印象。所以A&F嘅衫，有段時間，令到買嘅人feel good。雖然佢哋本身唔係look good，look good嘅只不過係嗰班模特兒。但who fxxking cares.jpg？

所以真正殺死呢間A&F嘅，係佢哋連製造幻象俾呢一班覺得會feel good嘅人嘅唯一賣點，都自己拎走埋——去年年中，停止再用半裸模特兒作招徠。

咁試諗下，比方說用波霸餐廳來做比喻：你啲嘢又唔好食（服飾設計平平無奇）；間餐廳有一陣臭味（「香水」味）；連一班用黎吸引客人嘅波霸侍應，都突然之間，改為穿著長西褲加oversize衛衣返工（冇大隻仔睇），咁你間野仲可以sell D咩呢？

既然冇嘢可以作為賣點，而佢又成日臭親喺路邊經過嘅我，對於佢嘅執笠，我表示高度支持，希望佢哋可以迎難而上，跟手執埋其他副線嘅分店就好了。

另一邊廂，一雞死，一雞鳴，A&F今年全球會有50間舖一齊執笠，但會喺大陸新開5間。

去吧A&F！喺全球品味最高嘅國度，重新起步啦！大陸人會欣賞你的！

加油啊！

text by Tyler Li (facebook: 泰兄）

（圖片來源：pinterest）