是日噏day：碧咸氏的原罪 成功需父幹？

常言道：「點解我老豆唔係李嘉誠？」如果俾同樣有錢有名有樣嘅碧咸你做老豆，又係咪一樣會事事順心呢？現年17歲嘅碧咸大仔Brooklyn，近排就幫Burberry拍左一輯廣告硬照，但特別之處，並非sell佢自己嘅靚仔樣，而係自己揸相機做攝影師。

Burberry Instagram係相片作品未正式發佈之前，就先行造勢，po 出Brooklyn Beckham用嘅相機，當中包括一張佢用手拿一部Leica R9相機嘅相。

另一張相，就見到三部拍campaign用到嘅相機，有眼利嘅網民就列出呢三部相機分別係咩來頭。

由Brooklyn Beckham操刀拍攝嘅Burberry This is Brit廣告硬照

啲相唔夠膽講係驚天地泣鬼神，但係的確係拍得唔錯，絕對見得下人。不過就有唔少網民批評，碧咸大仔係持住自己嘅家族身份同埋名氣，成功需父幹，所以先可以拍出呢輯相。

我地又不妨睇下，一啲名攝影師嘅作品，對比下碧咸大仔呢一輯相，係咪真係拍得咁差？

攝影師Mario Testino作品

攝影師Bruce Weber為A & F拍的照片

攝影師Mario Sorrenti拍碧咸著H&M

攝影師Terry Richardson拍Obama及Miranda Kerr

相片係咪真係拍得咁差，大家自行用眼睛判斷就可以了。但究竟佢老豆係碧咸，係咪真係一個可以用來批評佢本身能力嘅原因呢？無可否認，Brooklyn Beckham所使用嘅相機確實價值不菲，不過係咪攝影就等於器材先決，有貴機就拍得出靚相呢？

想當年碧咸出刀無幾耐，球技未達顛峰，卻開始為人矚目。但係外型俊朗，比球技帶來更多話題。當時就有唔少人，亦都係批評碧咸得個樣，成日轉髮型吸引大眾，根本唔係真正嘅足球員。睇嚟碧咸家族，就住「靚仔有原罪」呢一件事，屬於一道家族嘅魔咒。

碧咸大仔，喺早年大家都希望佢繼承七旋斬衣缽極期待底下，選擇唔去踢波，做自己鍾意做嘅嘢，可能係最能夠繼承佢老豆精神嘅一個行為。做自己鍾意做嘅嘢，同時承受大眾批評嘅壓力，如果真係有遺傳，睇嚟靚仔唔係佢得到最好嘅嘢，反為係呢種性格，係喺碧咸氏裡面得到最好嘅資產。

試諗下，如果碧咸當年球技未到成熟之境，就因為靚仔被公眾判死刑，唔堅持練波，又點會有後來各大賽事珍貴又刺激嘅演出呢？

text／Tyler Li