是日噏day：關於戀愛，三十歲以上男人在想什麼？

[ 向新對象打交叉的原因 ]
朋友L小姐有晚急電，話同男朋友分咗手，問點算。背景資料係，L小姐係20出頭嘅小妮子，同30到尾嘅男友，啱啱開始戀情兩個月。男友幾日前突然覺得大家性格不合，提出分手。雙方性格有咩不合，不贅了。但係對住極力希望復合嘅L小姐，提及普遍30歲打上男士，喺戀愛方面會有咩要求同埋諗法。等佢都可以思考下，同對方究竟仲夾唔夾得嚟。

各位巴打，又唔知認唔認同呢？

一、合則來不合則算。磨合？食得㗎？

年輕時拍拖，成日聽到嘅一句說話係：「有咩唔啱，我改丫。」但係活到某個年紀，已經太清楚自己性格有咩好、有咩唔好。人生閱歷亦都話畀自己知，所謂嘅改變性格，同「揾航空公司職員送回行李係慣例」一樣，根本係假嘅、係唔存在嘅。順理成章，無謂自欺欺人，覺得自己改變到。所以30打上嘅男人，發現雙方性格有根本上嘅唔夾，唔會再畀太多時間玩咩磨合。會覺得自己同對方，都唔需要改變，各自搵一個適合嘅人，才是王道。

二、對鬧交感煩厭

拎住電話嗌交嗌天光，係後生仔先有精神做嘅嘢。男人去到某個年紀，唔會再有心機做呢啲嘥心機捱眼瞓嘅嘢。因為聽日要返工，處理好多工作需要精神。如果兩個人一齊，會經常嗌交，又要氹番又要呵豬，男人會傾向搵過另一段成熟啲嘅關係。

三、獨立經濟能力

當然唔係個個都係陳X聰，唔會expect女仔係富家小姐。但你估淨係女人會考慮男人經濟能力咩？而家咩年代啊？其實男人都會希望伴侶有基本獨立經濟能力，又或者只係預見到女方將來就住獨立經濟能力呢樣嘢，同張家輝講一樣「就算你而家冇，將來都會有」，都OK。唔係要向女人攞錢，而係他朝一日touch wood就算自己窮到褲穿窿，諗緊點翻身時，都唔使擔心多一個親人。

四、怕女人無知，因為仔似阿媽

細細個，總係鍾意啲女仔innocent D，覺得又pure又true，正正子。但大個咗會意識到，當枕邊人難以溝通，不能分憂只能同喜，有幾咁大鑊。加上男人好多時去到某個年紀，都會發現其實自己同阿媽性格好似，如果呢個理論成立，都唔想第時個仔無知知咁、又pure又true架嘛，係咪？

五、性事足夠就好

女仔有時會以為男人上咗年紀，見識多啲，會想喺性事上做啲特別野去取悅對方。世界上當然有類人好似Kobe Bryant咁，打到37歲都仲咁有鬥心啦嘅不死戰士。但，聖鬥士星矢呢類角色，一般後生嘅時候確係好鍾意扮演，嗰種唔認輸嘅原始心態確係比較濃烈。但係到咗某個年紀，好多男人都唔會再用呢樣野嚟證明自己能力。心態上係，呢樣野，有就好，夠就好。適當嘅情趣當然OK ，但係唔使將呢個因素放得太大。第一至第四項講嘅，反為更重要。

text / Tyler Li