4大班戟漢堡推介 $15親民價長龍店、Cafe創新口味

日本嘅班戟漢堡可以話係遊日必食，但其實香港都食到㗎，例如以下呢幾間街坊排隊麵包店、日系塌塌米Cafe、連鎖店等，即睇佢哋嘅班戟漢堡有咩魔力啦～

大排長龍麵包店 泰興餅店

呢間麵包舖最近人氣大增，其中一個原因係新推嘅親民價「熱香餅漢堡」，每份只賣$15咋！老闆堅持分批即叫即做，厚身鬆軟嘅班戟搽上自家秘製醬料，麵粉香氣突出之餘仲甜甜哋𠻹，夾埋漢堡扒、芝士同煎蛋，一啖食落去味道和諧，口感豐富。呢款新品出爐時間係星期一至五嘅7:30am同12:30pm；星期六、日及公眾假期係2pm，開飯仔試咗平日12:20pm左右到，等大約1個鐘終於食到，不過會隨時截龍，記得預留時間排隊喇。

創新日式叉燒×蔥花蛋味 Coffee Question

Cafe繼早前推出三層熱香餅煙肉漢堡，最近又多一款創意口味喇。開飯仔就試咗以滑嫩蔥花蛋搭配日式叉燒，唔單只組合新鮮，味道都幾有誠意㗎！日式五花腩肥瘦相間，帶醬油嘅香甜味，夾埋鬆軟微燶邊嘅班戟幾有咬口。坐喺塌塌米座位，慢慢用刀叉食，就唔怕食得狼狽啦；加配花茶或咖啡一齊嘆，雙倍滿足啊！

雙倍邪惡！雙層豬柳芝蛋班戟漢堡 City’n Friends

新開業嘅橙色主調Cafe亦推出班戟漢堡，口味同分量選擇比坊間多啲選擇，而「雙層豬柳芝蛋班戟仔」落足2層漢堡扒同2層芝士，係雙倍邪惡啊！呢個漢堡嘅厚度，一啖咬唔晒咁多層，加上半融芝士本身已經係不敗食材，配合煎蛋兼軟熟嘅班戟更加好食。另外仲有煙三文魚芝士炒蛋、黑松露炒蛋口味可以揀。

連鎖快餐店早餐限定 快樂峰

唔想排隊又想過吓口癮嘅話，不妨試吓呢間連鎖店出品。早餐時段供應2款口味，分別有煙肉蛋同火腿蛋選擇，班戟偏薄身，口感軟腍帶少少楓糖香氣，加埋鹹鹹哋嘅芝士，食落幾香口。雖然賣相唔算好靚，但勝在熱辣辣同埋唔使排隊，早餐都可以追上潮流咁。

文：Sharon
編：Cathy