雅虎香港新聞 葉劉自爆用生殖科技生女 林琳：唔係人人似局長20幾歲結婚讀書一鑊過｜Ray Online
香港出生率持續下跌，立法會今日討論支援輔助生育政策嘅無立法效力議員議案。民建聯議員林琳正正係透過人工受孕，成功喺上年生咗仔仔「波波」。對於醫務衞生局呼籲「有仔趁嫩生」，林琳反問「18歲讀書，點樣生仔呀？唔係人人都可以好似局長(盧寵茂)金童玉女，20幾歲結婚讀書一鑊過」。
提出今次議員議案嘅林琳話，香港生育率低可以話係冠絕全球。雖然話「有仔趁嫩生」，但香港人學歷普遍比較高，婦女喺職場打拼，事業女性往往遲婚。唔少婦女要透過輔助生育，但係雪卵最多10年，而且要先結婚先可以用輔助生育技術，建議延長雪卵期限至30年。林琳話「18歲讀書點樣生仔呀？局長你話畀我聽，我本身份稿好有禮貌」。
新民黨議員葉劉淑儀認同講法，覺得盧寵茂呼籲「有仔趁嫩生」對職業婦女係好諷刺。葉劉仲自爆「我本人39歲先生一個細路仔，係用咗生殖科技」。
盧寵茂：生殖醫學唔應該代替本能
盧寵茂話生兒育女係上天畀人類嘅本能，係上天好大嘅恩賜，生殖醫學唔應該代替呢個本能。佢又提到持牌中心而家儲存咗2萬個凍卵子，但喺2023年只係用咗50個凍卵子，當中只係得7個係持續妊娠。
