晚巿放寬!60年代舊香港主題酒吧餐廳 中西fusion菜 + 自家釀製烏龍茶甜酒

·3 分鐘文章

終於等到晚巿堂食放寬,大家應該都好掛住收工後,同朋友出去hang out食飯,飲返兩杯吹下水嘅時光。酒吧未開得,但有酒牌嘅餐廳就可以呀。尖沙咀有間酒吧餐廳,以60年代舊香港為裝修主題,既有正餐食,亦有精釀啤酒、cocktails同自家酒廠釀製嘅酒等多款酒精飲品選擇,好好feel。

 餐飲經理Matthew Lau (左)、店長Kevin Lam (右)
餐飲經理Matthew Lau (左)、店長Kevin Lam (右)

位於轉角嘅呢間酒吧餐廳,裝修充滿舊日香港情懷,以紅、綠色為主調,有多款復古裝飾擺設,就連地下階磚都係舊時屋邨嘅感覺。另一方面,餐廳亦設有幾個窗口位,望住出面商場中庭位置,係各位打卡仔女最愛chill out位。

菜式方面亦以中西合璧fusion菜為主,先介紹必點嘅小食——黑松露多士,以200度高溫烘過嘅多士,非常脆口,中間夾有mozzarella芝士同parma ham,再加松露醬同沙律汁,仲有埋新鮮嘅松露喺面,一啖入口,香味立即爆晒出嚟。

另一道前菜吞拿魚西瓜他他嘅配搭夠晒特別,師傅仲特意選用被封為「西瓜之王」嘅8424西瓜,所以啖啖清甜多汁,感覺清新。 而且製作時撈埋wasabi汁同麻油,伴碟邊更有牛油果醬點綴,味道層次多變,有意外驚喜。

啤酒同豬手一向都係好拍檔,呢度有道脆炸鹹豬手,除咗配常見嘅酸椰菜外,仲有腐乳醬,中西式style都可以一次過試晒。先以腐乳搽勻豬手,再加埋香葉、黑椒粒、花椒、八角等7、8款香料醃製兩三日,不過就咁食嘅話腐乳味都唔算突出,要點埋腐乳醬先得。外皮燒到卜卜脆,夾酸椰菜食則可以中和膩感。

好多枱都會嗌鮮海膽汁意粉,呢個直情係中西日fusion菜,以茴香泡沫、西芹洋蔥再加埋奶打發成泡沫,賣相即刻加咗分,仲令到啲意粉滑咗添。

嚟到梗係要飲返兩杯啦,不過飲咩好?選擇都幾多,如果想要特別啲嘅,當然就試下由餐廳集團本身喺香港設酒廠釀製嘅Lunaqua,酒精度12%,full body酒體。多款唔同口味主要分為3個種類,果味、茶味同花香味。其中烏龍茶味同茉莉花味嘅甜酒,都好清香呢,又有少少茶味尾韻。最得意係餐廳特登用茶壺仔present,斟酒好似斟茶咁。呢隻酒本身用穀物酒做base,利用熱對流嘅技術,充份拎晒原材料嘅營養同埋原本嘅風味,除咗直接飲用外,餐飲經理Matthew Lau亦建議可以加冰或者梳打,使之更易入口。

精釀啤酒迷就慢慢喺18個tap頭中揀自己嘅心水啦,餐廳選酒既有德國啤酒,亦有多款本地高質素嘅品牌,例如有Carbon Brews嘅Crazy Rich Lupulins,呢款double hazy ipa嘅啤酒花味特別香,而且主要帶出嘅係熱帶水果風味,飲落唔多覺苦之餘,果汁感更重,好啱而家呢啲熱天時飲,清爽嘛。

餐廳另有cocktail選擇,有部分係已經premix好咗,喺tap頭一斟出嚟就飲得。亦有啲即場調製嘅,好似以懷舊花樽做杯嘅Memories咁,襯返舖頭主題,打卡啱晒。Matthew特別混入中式白酒調製,清爽得嚟帶微微辛辣感,不過就酸咗少少。

MOONKOK (K11 Art Mall)

地址: 尖沙咀河內道18號K11 Art Mall地下G34-G35號舖

文:Kar

相、片:Wilfred Chui

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能