暗寸「寫錯」填詞人名字 黃偉文陳奕迅不和傳聞浮上水面

陳奕迅年底舉行嘅世界巡迴演唱會廣州站，被網民發現內地當局發出嘅批文當中歌單部份，由林夕填詞嘅作品，填詞人名字都改成其他詞人。事件越鬧越大，更有傳廣州的主辦單位發聲明道歉，並取消有關批文。

其中一位「被填詞」嘅黃偉文，尋日趁父親節post咗已故爸爸舊照，分享爸爸原來曾經喺印度生活，樣貌甚似有印度人，當時家境仲好唔錯。Wyman又半開玩笑咁話「我個樣係完全唔似我老豆嘅，否則可能一早喺 Bollywood 紅透半邊天。到時就可以帶住爸爸衣錦還新德里，唔使好似而家咁，只得一首《單車》。（遲啲如果個作者名比人改咗就冇埋𠻹）」。咦，最後一句擺明暗串Eason一方「寫錯」填詞人呢件事，擲地有聲喎。

曾經合作無間兼且交情深厚嘅陳奕迅同黃偉文，早喺2013年就傳出「因財失義」。當時有報導指，因為版權費等問題，陳奕迅嘅Eason’s Life演唱會現場錄音專輯，並無收錄任何黃偉文作品。之後有傳吳君如為電影《12金鴨》搞慰勞宴，Wyman見到Eason蒲頭即刻拍枱嗌走人，要君如同同場嘅古天樂氹返。消息傳出後，Wyman曾經撰文澄清，但係2014年Eason獲英國母校Kingston University頒發榮譽博士，豪請30位好友去倫敦見證，Wyman竟然冇份。為Eason寫過無數歌詞嘅Wyman，自此亦無再為「前老友」寫過歌，甚至Eason所屬嘅環球唱片，都封殺Wyman唔交歌俾佢寫。

雙方關係一度出現「回暖」。2017年Wyman生日，Eason同太太徐濠縈以時裝設計師山本耀司及川久保玲嘅造型現身party，落足心機打扮，可謂畀足面。不過今次Wyman出post暗串Eason，似乎將不和擺上枱，要做返「最佳損友」？難啲喇。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！