曾被阿儀鬧人格有問題「索爆經理人」林寶玉宣布辭職

亞視一姐薛影儀（阿儀）早前同公司AMM亞洲心動娛樂炒大鑊，佢同被稱為「至索經理人」嘅林寶玉關係亦惡化。呢期同阿儀玩得好埋嘅黃榕成為導火線，甚至有傳阿儀結交損友，有人疑似利用阿儀名氣幫手出席商業活動同出post，變相「做義工」。

消息傳出後，林寶玉當時回應話擔心阿儀誤交損友，而阿儀多次喺IG澄清，又力撐「黃榕佢d脾氣,性格都好好呀！」。反觀對經理人林寶玉，阿儀就直斥對方「佢性格,脾氣,行為唔好」。一輪擾攘後，AMM亞洲心動娛樂發聲明，宣布「無限期暫停為阿儀計畫接下來的工作和投資，也保留會對她採取的一切紀律和法律行動」。

日前先為自己開嘅美容店揭幕嘅林寶玉，尋晚突然發文預告會離開AMM︰

有傳媒向寶玉求證，佢話自己能力上配合唔到公司需要，希望來年走向另一個考驗，並多謝AMM的栽培。林寶玉2020年參加亞姐並奪得「網絡人氣獎」，之後成為亞視／AMM藝人兼經理人。2021年阿儀參加亞姐成為奇葩，被亞視旋即簽下做藝人，而早一年參選嘅林寶玉就成為「師妹」嘅經理人。阿儀因為唔戴口罩仲起腳踢街坊而被起訴，林寶玉陪佢出庭同見記者，由於言談得體兼且同阿儀外表有反差，外界封寶玉做「索爆經理人」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！