最佳女配角尹汝貞「寸爆」畢彼特

東方日報
·2 分鐘文章
尹汝貞憑《農》片的搶鏡演出,勇奪奧斯卡。
尹汝貞憑《農》片的搶鏡演出,勇奪奧斯卡。

韓國女星尹汝貞大熱捧走《第93屆奧斯卡金像獎》最佳女配角殊榮,成為首位獲奧斯卡的韓國演員,她妙語如珠大開該片製作公司老闆兼頒獎嘉賓畢彼特(Brad Pitt)玩笑,指他於拍攝期間影都冇!

於荷里活韓語片《農情家園》(Minari)飾演美國移民家庭醒目祖母的73歲韓國女星尹汝貞,於頒獎禮擊敗《波叔出城2》(Borat Subsequent Moviefilm)的Maria Bakalova、《絕望者之歌》(Hillbilly Elegy)的格蓮高絲(Glenn Close)、《爸爸可否不要老》(The Father)的Olivia Colman及《曼克》(Mank)的雅曼達施菲(Amanda Seyfried)奪獎,成為首位獲小金人的韓國演員,亦是繼1957年電影《櫻花戀》的日本女星梅木三吉後,第2位獲女配角獎的亞裔女性。

上屆奧斯卡最佳男配角得主畢彼特擔任頒獎嘉賓,他亦是《農》片製作公司老闆,尹汝貞以英語致詞時大開他玩笑:「畢彼特先生,終於見面啦!幸會。我哋拍戲時你喺邊度?好榮幸見到你。」又笑言自己經常被外國人讀錯名字:「不過我今日原諒你哋!」她自言以往只透過電視睇奧斯卡,現在親身到場,感到難以置信。

冇聞偶像:我又唔係狗!

尹汝貞識做地為其他提名女星笠高帽:「我唔相信競爭……我點會贏到格蓮高絲?我哋全部都係贏家。」向來風趣的她,之前在《英國影視藝術文化學院電影頒獎禮》(BAFTA)獲獎時,指「英國人這麼勢利眼」也頒獎給她,實在難得,認真夠薑!今次她則賣口乖說:「我今次只係有啲好彩,應該係美國人嘅好客之道。」又不忘多謝2名兒子:「媽咪有努力工作,先可以攞到呢個獎!」

致謝後,尹汝貞與畢佬行入後台時密密傾,其後記者會有人問到「畢佬聞起來是甚麼味道?」,她對記者的無禮提問也答得勁爆:「我冇聞佢,我又唔係狗!」自稱是畢佬多年粉絲的她,笑言與對方見面非常興奮:「我可能個腦停咗幾秒!」被問到是否想與畢佬合作演戲,她說:「唔會啦,以我英文程度同年紀,我諗好難,呢個係唔可能嘅夢想。」