雅虎香港新聞 有買趁手 6款柴油車推介
政府呢鋪明玩嘢，講明10月1日起收緊新登記柴油私家車的排放標準，由歐盟六期改為加利福尼亞廢氣排放標準LEV III，但BMW、Mercedes-Benz、Audi等港人最愛的大汽車品牌都說香港市場上沒有合乎該資格的產品……也就是變相說10月1日後，香港可能再無新柴油私家車購買！唔緊要，我哋香港人最醒目，誓必在法例實施前入手。不過平日都唔留意吓柴油私家車，應該買咩好？我介紹你！
Maserati Levante
本人第一推介便是Maserati踏入SUV界的首部傑作Levante，說了好幾年，終於於去年來到香港。這SUV的跑格味道相當濃烈，採用2,987c.c.的V6柴油Turbo，柴油版的馬力也有275匹，夠晒喺香港使用，而且更可以幫你省油，油耗也不過是每100公里7.2升。但買得Maserati無非都是貪名貪款，柴油版也百多萬，省油與否，唔重要亦無得你揀，因為品牌只為香港引入柴油版本。難道Maserati早已知道香港這新例，所以想食盡個搶購潮？
BMW 218d Gran Tourer
除了SUV外，7人車便是香港人的第二最愛，寬敞寬適又好揸，但食油就梗架喇。所以不妨考慮下柴油版的7人車，馬力係細少少，但香港地夠用就得啦，仲想載住老婆仔女、岳父岳母喺屯門公路飛百三、百四嗎？乖乖地，買架BMW 218d Gran Tourer 7人車，配備BMW TwinPower Turbo四汽缸柴油引擎，150匹馬力細細哋代下步，每公里油秏都只是大約四毫子，又特大天幕式天窗，又靈活車廂座椅編排，又空間寬敝，抵啦吓話！
Land Rover Discovery
Land Rover的Discovery不論哪個年份、哪一代，一向在香港都有柴油版本，而如果想買柴油車的受友們不妨考慮一下它。最新一代的Discovery柴油版擁有258匹馬力，0-100km/h只需8.1秒，以柴油車而言，表現相當出色。最重要的是油耗表現只是每百公里7.2升，比汽油版本低三成有多。都係嗰句：「揸得大車，學咩人飛，香港地258匹馬力好夠啦！」，同埋最重要，Land Rover Discovery型呀！
Kia Sorento
冷門少少唔講大牌，Kia的Sorento絕對符合到港人買車「慳油、空間、舒適」的三大要求。Sorento於香港都有柴油版本，2199c.c. 直列4汽缸柴油渦輪增壓，前置引擎，200匹馬力都幾勁架，唔使10秒完成0-100km/h。不過買得柴油版，無非都係想慳錢，每6.6公升柴油可行駛100km，除開都係六毫子一公里。名氣就當然無BMW咁大、車款無Land Rover那些咁型，但勝在實用，7人車喎，夠生活化！
Mazda Mazda6 SKYACTIV-D
好似介紹得太多大車，講返d五人柴油私家車。本人覺得萬事達的Mazda6 SKYACTIV-D絕對是平民柴油車的表表者，因為配備了Skyactiv-D科技的2.2公升柴油引擎，並附設了來自韓國Honeywell出品的Turbo，可提供高達2.7bar的增壓值，擁有175匹馬力，但試揸過就知，起步、加速都相當凌厲，有些人更說可媲美4.0L V8汽油引擎，可能誇張了點﹐但絕對是力量型的柴油車，不過油耗極低，100km大約5升，每公里六毫！
Volvo S90
既然係趕水尾買柴油車，就不如再趕埋北歐牌子Volvo條柴油水尾，因為Volvo早前表明由於研發成本越來越高及維修複雜程度，所以將會完全退出柴油車市場。而Volvo最近正在大轉型，S90便是品牌努力轉型的成果，外觀與內裝的質感都有所提升，不再是老牌汽車的感覺，而是豪華了、年輕了，效果相當不錯，本人相當看好Volvo之後的發展。而S90正好在品牌宣佈唔玩柴油前推出了柴油版本，190匹馬力，加速力唔錯，起步、超車全部舒服開心，8秒左右可完成0-100km/h加速。其實柴油版的S90真係買得過，五、六十萬但慳油環保，性能OK，裝置豪華﹐性價比極高。
更多相關報導:
擁有跑車係好多男人心願！Honda NSX同Mercedes-AMG GT R你揀邊部？
Follow us on facebook @Esquire HK
