本地5大手作雪糕 夏日必嘆涼果、Fusion口味

夏天必食嘅梗係雪糕啦！手作Gelato一直受大家歡迎，呢幾間本地店舖嘅出品，口味更加層出不窮，保證有驚喜～

自家製栗子+涼果口味軟雪糕 皇甘栗鮮炒乾果專門店

大埔呢間小店由賣傳統糖炒栗子同涼果起家，向來口碑不俗，而老闆用自家出品嘅栗子同涼果推出手作軟雪糕之後，更獲得一眾關注組成員同網民大讚。其中栗子軟雪糕採用鄰近天津嘅遷西栗子，果肉香甜得嚟口感軟糯，配合北海道3.5牛奶新鮮製作，令軟雪糕質感幼滑，富濃郁栗子香氣。另外店家自創五花八門嘅涼果口味雪糕，就有生薑、陳皮、話梅，開心果等等，選擇都幾豐富㗎～

本地農產製作創意口味 野草

如果你係鍾意試古靈精怪嘅創新食物，呢間絕對要bookmark！北角Gelato咖啡小店開業近4年，一直致力同本地小農場合作，店主唔單只採購時令嘅農作物支持本地農業，更會融入gelato當中，創作獨特口味，例如白粟米、木瓜、番薯、芫荽、桔仔、紅頭蔥等，店主一雙巧手就將農作物搖身一變，成為本地特色意式雪糕。

西貢人氣特色Cafe Hushush Ice Cream Coffee

西貢嘅人氣小店，以咖啡同自家製創意雪糕作招徠。佢嘅雪糕不含防腐劑同添加劑，更不時轉換口味，每個批次都唔係大量製作，保證「新鮮」兼有新意。例如最近推出嘅「Guinness sourdough with caramel tomato」口味，真係加入番茄製作㗎。另外仲有斑蘭椰子、格蘭菲迪15年單一純麥威士忌等特色口味。

每月轉換主題 GANTO

上年年尾由網店變成樓上實體店，日前更宣佈即將搬去地舖，方便雪糕控揾到佢哋，但其實每月唔同主題嘅手作Gelato，已經絕對有特色！六月以茶為題，如武夷大紅袍、福州茉莉毛峰、明前龍井都啱茶控一試。另外亦有固定口味，其中豆腐紅糖就有種「冰凍版豆腐花」嘅感覺。店舖現時每日供應12款雪糕，法式焦糖燉蛋、Tiramisu味都值得一試。

意大利人主理健康Gelato Mamma Mia Gelato

品牌由三代經營意大利雪糕店嘅意大利人創辦，選擇留港開店，其中一個原因係店主同香港人妻子結緣，於是留港定居。佢嘅gelato打破「肥」嘅概念，皆因無脂肪、色素、添加劑、乳化劑同防腐劑；選用世界各地新鮮水果，以低溫技術製作軟滑嘅口感，夠晒誠意。數十款口味分為全素、低糖同無糖系列，如赤肉蜜瓜、開心果、椰子味。

文：Cathy、Sharon