李佳芯街頭被野生捕獲 內地網民竟唔識Ali：這個美女是哪位？

李佳芯（Ali）為公認嘅女神級藝人，加上性格貼地及出色演技，深受觀眾喜愛。不過，近日有網民於小紅書PO出李佳芯生圖（未修照片），表示自己於香港堅尼地城偶遇明星，但唔知佢係邊個，寫道：「9點左右堅尼地城，那邊不讓走，有攝像和打光，感覺是在拍海報或者什麽節目？這個美女是哪位明星呀？」唔少網民都留言回應樓主，指相中人係李佳芯；從照片中看到，李佳芯即使淡妝示人，加上於街頭被大風吹到個頭亂咗，但依舊美艷動人，充滿女神氣息。

李佳芯自去年底劇集《有種好男人》後就未有接拍新劇，更被派往澳洲擔任《2023澳洲華裔小姐競選總決賽》評判及表演嘉賓，屢被指遭TVB冷待。另外，去年內地社交網轉播《萬千星輝賀台慶》節目片段時，李佳芯又慘遭打格遮樣，令一班粉絲感到痛心及擔心其工作發展。李佳芯早前透露有監製搵過傾拍劇及叫佢預留檔期，但因製作資金和其他問題延期；不過，佢亦表示自己正與TVB斟洽續約，但就未傾到合適條件，要再商談一下。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！