【李施嬅結婚】入行4段戀情 拍劇撻著鄧健泓 舊愛變胡杏兒老公

過幾日就40歲生日嘅李施嬅，今日喺IG出post公布喜訊！Selena喺個post度寫「牛年一定會更好。因為有這樣的新嘗試（咪高峰emoji），也有甜蜜的新嘗試。（戒指emoji）YES! 」，並貼上無名指帶上戒指嘅相，恭喜！

李施嬅有過幾位「含金量」高嘅男友，但自言能力緊要過副身家。唔知未來老公係咪夠晒smart先吸引到施嬅呢？

鄧健泓5年情 第1年已經知唔夾

咁多年來，李施嬅同鄧健泓嘅戀情最常被提起。鄧健泓舊愛原子鏸、張嘉兒以及李施嬅都係港姐出身，被傳媒稱為「港姐收割機」。2005年，入行冇耐、仲係叫「李詩韻」嘅施嬅，拍劇集《老婆大人》時同劇中男友鄧健泓戲假情真。當時鄧健泓同原子鏸散咗一排，冇幾耐就將施嬅追到手，據聞就係靠教外國讀書嘅施嬅學中文。

同鄧健泓之後，李施嬅有段時間被指戀愛大過天，甚至傳出TVB要佢事業愛情2揀1。最後呢一對拍拖5年後分手收場，多年後李施嬅剖白，話同鄧健泓一齊一年就知唔適合，對方唔係佢嗰type，拍拖係因為當時爸爸生意失敗，被鄧健泓嘅細心關懷打動。後來因為執著唔想放棄，加上一齊住，因而拖拉4年，直至施嬅返加拿大完成學位，有時間反思先至決定分手。

李乘德舊愛變姊妹老公

分手大約一年，李施嬅同年青才俊、搞夜場生意嘅李乘德(Philip)拍拖，結果一年後分手收場。但呢段關係最為人談論嘅係，Philip同施嬅分手後一段時間，睇到施嬅好姊妹胡杏兒微博post嘅泳裝照當堂觸電，仲托朋友搵辦法識杏兒。之後佢地喺朋友生日飯局碰面，話咁快撻著，2015年結婚，而家杏兒仲陀緊第3胎啦！對於呢段「前後腳」關係，杏兒同施嬅都好大方，杏兒結婚仲預埋施嬅做姊妹，連個仔都契埋俾施嬅，好有愛！

戀富商無疾而終

之後李施嬅再傳有新戀情，當時有報導話男友係商人潘樹維，喺香港同美國兩地都有生意，而且熱愛潛水，施嬅會陪男友周圍去。呢段關係曾經幾穩定，施嬅視男友係結婚對象，而且已經共賦同居，甚至揸男友公司名下架車出入，但係最終都係無疾而終。

神秘年下男 姊弟戀嫌煩

施嬅接受周刊訪問講感情事時，自爆試過同後生過自己嘅男仔拍拖，但就覺得對方太黐身，男友又會嫌施嬅冇時間陪佢，令施嬅覺得好煩，亦希望另一半年紀比自己大。至於被指歷年結交唔少才俊，施嬅就話男友有能力比有錢緊要，寧揀叻仔都唔揀有錢仔喎。

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！