李玟老公「身邊人」代爆料 Bruce負責太太生前開支 參與Coco後事屢受阻撓

李玟Coco上月初逝世後，Coco家人同Coco丈夫Bruce（樂裕民）嘅不和浮上水面，更傳出喪禮上李思林高呼「有人害死我個妹」。Bruce一直保持沉默，但有傳媒聲稱搵到佢嘅「身邊人」，講出多宗李玟生前死後傳聞嘅另一版本。

報導未有提及「身邊人」真正身份，但對於李氏一家在Coco後事上冷待Bruce頗為不滿，認為Coco 兩名繼女被安排喺公眾時段吊唁，做法唔妥當，並指後來Bruce要求之下先至令兩名女兒可以喺其他時段到殯儀館。而「身邊人」又指Bruce嘅花圈未能送入靈堂，反而其他人致送嘅就可以，呢個講法同負責喪禮嘅公關稱殯儀館冇拒收花圈，又係2個版本。

「身邊人」提到由於Bruce喺Coco設靈時一直受冷待，喪禮當日亦未獲安排扶靈，於是選擇自行到火葬場。「身邊人」表示，唔明白點解外界話Bruce「不請自來」同埋「喪禮唔見人」。

提到Bruce同Coco一家關係，「身邊人」話本來唔錯，會一齊食飯甚至去旅行，「身邊人」強調旅費有時係Bruce出晒，仲話有晒單據。「身邊人」亦澄清，Bruce同Coco 2011年嘅億元婚禮係由Bruce埋單，Bruce多年來亦一直負責Coco所有開支，即使Coco逝世前同Bruce分居，Coco因為患癌搬到頂級酒店居住，房租等開支繼續係由Bruce畀。

而「身邊人」亦推翻Coco逝世後多項傳聞，包括指Bruce搵助手通知Coco二家姐李思林(Nancy）Coco出事、Bruce唔俾李家家人去赤柱寓所拎Coco生前衣物等。「身邊人」話Coco喺媽媽屋企出事，大家姐Carol在場，Bruce搵助手通知Coco二家姐並唔合理。而Bruce亦冇阻撓李家家人入屋。「身邊人」聲稱Coco曾向Bruce提過將骨灰撤喺馬爾代夫，Bruce都有向李家提及，但未知Coco心願能否喺Bruce同家姐們關係緊張之下達成。

另一方面，有媒體稱Bruce打算向高院申請，由法醫調查Coco真正死因。有律師認為即使Bruce可以丈夫身份提出，但除非涉及醫療失誤等原因，否則批准機會不大。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！