李龍基女友Chris上載甜蜜合照遭網民揶揄「嘔番七間屋出嚟」 IG出12字Story疑回應謠言

被稱為TVB「御用皇帝」嘅73歲李龍基，與年齡相差36歲嘅女朋友Chris Wong唔經唔覺已經拍拖四年，二人經常出雙入對及上載二人與朋友的合照到社交網站，非常恩愛甜蜜。係今年年初，李龍基更向傳媒表示有計劃喺今年低調迎娶Chris，不過因女方家有白事，紅白相沖，婚期要延期。雖然婚禮未有喺今年進行，不過Chris趁住聖誕節相聚，二人甜蜜合照到社交網站，結果惹來網民瘋狂討論及對Chris質疑。

李隆基係圈中嘅隱形富豪，錫女友嘅佢更早已將7個物業全歸Chris名下，因為曾經講過怕自己先走一步，咁樣可以令佢有保障及生活無憂。喺普天同慶嘅聖誕節，Chris喺社交網站上載與李龍基嘅合照，疑似打算用行動去反擊網上謠言。相中二人戴上充滿節日氣氛嘅麋鹿頭箍，李龍基更鬼馬地擺出手勢，並寫上：「上善若水大家嘟（都）聽過，但是下半句未必大家知道，水利萬物而不爭！就像水的品性一樣，澤被萬物而不爭名利。面對流言蜚語和質疑和抨擊惡意中傷！但行好事，莫問前程！弘一法師說過：希望別人好，別人未必好；但你肯定好，因為你內心有美好！見不得別人好，別人也未必就不好；但是你肯定不好，因為你內心沒有美好！人為善，福雖未至，禍已遠離；人為惡，禍雖未至，福已遠離。」

呢個PO出街後，網民對Chris質疑並冇減少，更有人留言：「夠薑嘔番七間屋出嚟囉！」，之後Chris亦有留言反擊「詆毀我之前你確定知道的是事實全部嗎？」不過Chris最後刪除留言及關閉社交平台留言功能。去到噚日，Chris再喺IG Story用黑底白字方式寫上：「大直若屈 大巧若拙 大辯若訥」，疑似回應謠言。

雖然Chris關閉社交平台留言功能，不過網民依然繼續留言嘲諷李龍基，例如「有錢有真愛.」、「2個月後又再延遲，直至永遠」及「古有李隆基，敗在楊貴妃。今有李龍基，被當提款基。」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！