東張西望丨87歲余慕蓮於安德尊米雪陪同下立遺囑 將餘生積蓄捐贈略盡綿力

87歲資深演員余慕蓮（魚毛）於2020年因患上肺纖維化於深切治療部留醫咗半年，喉嚨都開咗一個，幸好最終大步檻過，直至近月覆診，余慕蓮身體狀況有變，而佢就正嘗試特效藥，暫時成效唔錯。不過，余慕蓮表示自己無人無物，希望喺有生之年安排好遺產分配。TVB節目《東張西望》昨日（26日）報道余慕蓮喺摯友安德尊及米雪陪同下協助訂立遺囑嘅過程。

安德尊與米雪因曹達華而認識到余慕蓮，並成為好友，余慕蓮一旦有事都會同佢哋商量。於《東張西望》中，節目交代余慕蓮健康狀況，指佢近半年嘅健康大不如前，每月藥費要逾萬元；由於余慕蓮喺訪問過程中一度咳嗽，就由安德尊和米雪代言，安德尊又透露余慕蓮於今年其中一次覆診更被醫生阻止出院。病患令余慕蓮身心有所改變，對生死亦睇得通透：「咁我又唔驚嘅，我都係80幾歲。」、「每個人都會死，我希望死嘅時候係瞓瞓吓覺去咗。」不過因為唔知自己幾時會離開，因此就想喺生前先立遺囑完成心願，捐出自己嘅遺產以幫助社會上更多嘅人，略盡綿力：「因為我無親人。自己以前好慳，儲埋一筆錢。」為迎接重要嘅立遺囑一日，米雪客串一日化妝師，為久未喺鏡頭前露面嘅余慕蓮剪頭髮和化妝，期間余慕蓮見到自己有皺紋，覺得有啲醜而唔願意上鏡：「而家個衰樣有啲唔想見人。」米雪就鼓勵佢。

余慕蓮早年捐款8萬元俾山區學校助小朋友讀書，並已將效力TVB十年嘅員工金牌及首飾等一一送出，今次就分別將餘生積蓄捐贈予工業傷亡權益會，以及將位於旺角嘅物業捐贈予東華三院。過程得到安德尊與米雪見證與協助，二人除咗表示支持余慕蓮，更為佢可以親力安排百年嘅事感安樂，安德尊指：「頭先見到佢笑，好開心，感覺到佢就算將來離世，如果呢個世界係會返嚟，佢亦會望到。」米雪姐則笑言：「學大王話齋，呢個係『捐獻旅行團』，我今日睇到佢（余慕蓮）由頭到尾無傷感，好開心啊，見到你（主持）仲開心啊，話鍾意靚仔，佢（余慕蓮）自己一路就喺到笑，好開心咁過。」又指喺余慕蓮身上學到豁達樂觀嘅精神。余慕蓮接過東華三院印有「余慕蓮女士物業捐贈」字眼嘅感謝狀及工業傷亡權益會嘅鮮花一露笑容，仲於接受訪問時直言：「安樂晒」，又表示了咗佢個心願，如果唔係死咗之後都唔知交畀邊個。

工業傷亡權益會又於社交專頁分享余慕蓮捐出部份遺產及一同食飯嘅照片，並感謝余慕蓮、安德尊及米雪，寫道：「親愛的余慕蓮女士：感謝您的無私和大愛；感謝您看到工權會的工作，並信任我們。工權會陪伴工傷工友及意外遺屬走過難關，工作繁重且艱巨，幸得社會關注和認同，成為我們繼續前行的動力。 我們定會好好運用你的善款，不負所托，繼續與職業傷病者及意外遺屬同行。祝魚毛姐生活愉快，身體健康！ 蕭倩文 工業傷亡權益會總幹事」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！