林子善重提頒獎典禮台上激動跪拜一事 親回應「鐵馬家族」不和傳聞

林子善於今年初舉行嘅《萬千星輝頒獎典禮2023》勇奪「最佳男配角」獎項，一向係喊包嘅佢除咗激動落淚，更喺地上跪拜咗一下，成為城中熱話。日前（13日）林子善擔任由堪輿學家麥玲玲和施焯日（Arthur）及蔡景行（行仔）主持嘅TVB Plus清談節目《玲玲友情報》嘉賓，重提跪拜一事及回應「鐵馬家族」不和傳聞。

於《玲玲友情報》節目上，林子善直言其實事前無諗過會獲獎，亦自爆獲獎前曾被高層叫佢千祈唔好喊：「當晚係好緊張，當日我同一位高層擦身而過，但佢行過咗之後行番轉頭同我講：『如果拎到獎，千祈唔好喊呀！』因為平時同高層都唔會接觸，當時覺得佢只係講吓啫。」林子善於當時頒獎典禮講述得獎感言時，就有解釋指個跪拜係畀父母。而於《玲玲友情報》上，佢又重提當時跪拜只係拜謝父母：「點解你可以嚟呢個世界？就係因為你父母，我哋中國人傳統就係叩拜，我好清楚咁話畀大家知，呢一跪其實係多謝父母。」

林子善與鄭嘉穎、馬國明、黃嘉樂及唐詩詠早年因拍攝《鐵馬尋橋》而成為好友，並組成「鐵馬家族」，不過近年屢傳出「大哥」鄭嘉穎多次缺席聚會及與馬國明鬧不和嘅傳聞。林子善於節目回應指鄭嘉穎為人直接，一諗到就會講，但為人及內心並唔係大家所想嘅咁差，又指因為鄭嘉穎非常疼愛小孩子，所以三個兒子出生後同好多朋友都少咗見面。至於麥玲玲又透露，曾經喺入行時有記者同佢講「鄭嘉穎好寸」，又更試過問記者「你邊間㗎？仲未畀人炒咩？」，不過麥玲玲和林子善都知鄭嘉穎其實係講笑。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！