梁朝偉無預警上商台《晴朗》受訪 罕談劉德華︰嗰時好好朋友 佢好照顧人

梁朝偉同劉德華主演新片《金手指》年底上映，今朝早電影公司安排梁朝偉單人匹馬上商台《在晴朗的一天出發》做嘉賓。主持之一林海峰都話好驚喜，因為個節目做咗咁多年，梁朝偉係第一位嘉賓。

近年成日被形容有「社交恐懼」嘅梁朝偉，直言好多年冇上電台，但因為當年為商台錄廣播劇而識落唔少 DJ 同幕後，所以覺得親切。梁朝偉拍《金手指》再同《無間道》編劇莊文強合作，林海峰提到莊文強聲稱梁朝偉對劇本好有要求，只要有一場戲唔合心水都會唔接，梁朝偉立即否認，而且會同對方喺片場商量點修改劇本，但後來梁朝偉都承認推過好多份劇本，因為「冇咩 feel」。至於點解接拍套戲，梁朝偉話同莊文強以及曾經一齊係「五虎將」嘅劉德華重聚都係原因之一。

另一《晴朗》主持盧覓雪提到《金》嘅一條宣傳片段中，梁朝偉需要扮暈，而劉德華就為免偉仔撞到頭而用手扶著梁後腦。梁朝偉隨後輕描淡寫咁話華仔「佢好照顧人」，又提到當年拍《鹿鼎記》時同華仔「嗰時好好朋友，而且拍咗幾十集，所以建立咗好好關係，同埋建立咗好多信任」。梁朝偉提到同華仔嘅合作唔止《無間道》同《金手指》，中間仲拍過好多戲，但係佢形容嗰啲戲「爛爛地，冇咩人記得」。偉仔又直言好少睇自己拍嘅戲，即使搭飛機有自己作品播放，佢都會唔睇。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！