梁芷珮再帶囡囡染髮惹批評 強調染髮劑天然唔會傷及頭皮髮根

TVB旅遊節目《潮什麼》系列主持「旅遊達人」梁芷珮（Christy），與攝影師老公Kenneth育有兩子一女，Christy不時喺社交網站分享與屋企人嘅生活點滴，一家五口相處融洽，幸福美滿。上年佢曾經帶囡囡Kasey去髮型屋，將部份髮法染成粉紅色Highlight，結果引起唔少網民批評其教育方法及唔識教女。近日趁住暑假，Christy就再帶Kasey去染髮，再次惹嚟網民抨擊。

日前Christy帶囡囡Kasey去髮型屋染髮，將底層頭髮漂白，然後染上桃紅髮色。梁芷珮仲將囡囡換上「耳圈染」新髮型嘅影片上載到社交網站與網民分享，唔少網民都大讚囡囡新髮型好睇同少女味濃，例如「妹妹頭髮染得好靚」、「少女咗喎」、「顏色好襯呀妹」、「好靚女」及「Kasey 好靚呀新髮色」等等。

同時亦有唔少網民批評及質疑小朋友染髮，留言話「會唔會好傷頭髮同頭皮，咁細個」、「靚就靚，但細佬（路）仔會唔會傷頭皮？」、「返唔返到學㗎」、「咁細過（個） 唔好染髮啦 返學點算？」及「你始終都唔明重點唔係D用料，係行為呀」等等。

喺接受傳媒訪問時，梁芷珮就話幫囡囡染髮嘅髮型師好有經驗，染髮劑與頭皮距離至少兩吋，再加上染髮劑採用天然成份，所以係安全，唔使擔心會傷到囡囡嘅頭皮同髮根。另外，Christy亦話Kasey就讀國際學校，而學校對學生嘅儀容冇傳統學校咁嚴格。同埋佢哋一家五口下月將會前往非洲拍攝《非洲潮什麼》，趁暑假玩下冇問題，所以Christy估計囡囡9月返學時，桃紅髮色已經甩晒。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！