楊明投訴冇耐性 與莊思明「互數」

楊明與莊思明情侶檔上陣整蘿蔔糕迎新年，2人在廚房分工合作，期間卻大耍花槍，爆笑「互數」！思明今年因疫情而未能返家鄉過年，卻笑言反而令她避過一劫！

藝人楊明與女友莊思明今年留港度歲，旗下食肆有推出賀年糕點，2人即場偷師，並合力炮製蘿蔔糕應節。思明坦言是首次整糕點，又踢爆男友只懂煮即食麵，不過他們整糕點有板有眼，尚算合格。

講到新年，思明以往例必回家鄉馬來西亞探親，今年因疫情而破例，但就讓她避過一劫：「阿媽一年只會喺新年下廚一次，佢個人比較燥底，可能煮得太辛苦，我哋有少少嘢做得唔好佢就嚟料，每年未到年初二就提早開年，依家諗番都幾好笑，好似變成一個傳統咁。」她打趣說若媽咪喜歡，歡迎透過電話向她「開年」。

自爆成日畀女友點

另外，問到新一年最想戒掉的壞習慣，楊明笑說：「我要戒咗戴口罩呢個習慣，哈哈！思明就唔好再鬧我，唔好再點我做嘢。」思明即反駁他：「你有冇諗過如果我叫你做嘢，你即刻做就唔會畀人鬧？」又指希望男友戒掉「冇耐性」這個缺點，楊明搞笑即時抗議：「竟然係一個最冇耐性嘅人咁講。」思明沒好氣地解釋：「你冇耐性先令到身邊嘅人冇耐性，你都唔明！我都冇耐性，我要知就要即刻知，否則就會着着哋。」2人你一言我一語互窒，場面爆笑！

談到結婚大計，楊明坦言：「前年諗住過2年先，點知依家就疫情，所以冇特別去諗。喜慶事想開開心心，但依家擺酒又要相隔幾多米，每個人個心仲係擔心疫情，所以都唔想呢段時間去做。」