死過翻生 重返出事球場！余德丞 公開感謝它救一命⋯

今年8月，無綫藝人余德丞(Dickson)於西營盤中山紀念公園球場踢波，期間暈倒昏迷，其後由救護車送往瑪麗醫院搶救，並在深切治療部(ICU)留醫。當時好多人都非常擔心他的安危，大家紛紛為他集氣，幸經過搶救與治療甦醒過來，留醫一個月後出院，死過翻生嘅Dickson日前佢重返當日出事嘅球場，百般感慨之餘，還不忘公開感謝「它」救他一命⋯⋯

撰文：東方新地 圖片：新傳媒圖片、余德丞IG

延伸閱讀：

【跳躍生命線】郭子豪package靚到冇朋友！大台15位富貴兵團逐個捉

《跳躍生命線》劇照大賣關子 眾人手執白玫瑰浩園哀悼佢？

余德丞8月踢波暈倒昏迷

余德丞今年8月與朋友在西營盤中山紀念公園球場踢波，其間疑身體感不適到場外長椅休息，未幾突然暈倒昏迷。余德丞其後由救護車送往瑪麗醫院搶救，幸好脫離危險期，留醫一個月後出院。警方初步調查，相信事件無可疑，列為有人暈倒案處理！

余德丞出院 短期內不可做運動

計番佢差唔多住院一個月，余德丞IG發長文多謝瑪麗醫院醫護人員、家人、朋友、所有關心佢嘅人，仲話：「生命無take 2 ，今次咁好彩有多一次機會，我一定會好好珍惜。」

余德丞 重返出事球場

出院後仍未正式復工嘅Dickson，日前重返當日出事嘅足球場，死過翻生，再返去當然百般感慨！

全靠佢救一命！余德丞 感謝它⋯

當日Dickson暈倒昏迷期間，全靠同隊一名休班護士即場急救，並使用場地設置的自動心臟去顫器（AED）作急救！所以Dickson不忘多謝呢部自動心臟去顫器（AED），說：「You have the power to save a life. Thank you.」

元朗公園球場 自動心臟去顫器被盜

康樂文化事務署在各運動場設置的自動心臟去顫器（AED） ；該設施是用作為有需要人士的救命工具，為遇事者進行心肺復蘇，增加存活率。據悉，現在於康文署各場地設有約300部，每部價值約1.8萬元。

自動心臟去顫器通常放於職員辦公室外，如有人打開拿取，頂部紅燈會提示職員

單拖睇Eason免費音樂會

Eason陳奕迅上周六在中環海濱舉行的《L.O.V.E. IS L.I.V.E.》免費慈善音樂會，余德丞都有去睇騷，不過當時見佢面色都係麻麻，睇嚟Dickson真係要多休養，好妈調理身子喇！

蔡思貝 同余德丞襯「情侶裝」

余德丞出院後首次公開現身，孖住蔡思貝一齊出席活動，兩人喺活動上同樣著上黃黑色打扮，似足情侶裝！

喺台上兩人更「打情駡俏」，Dickson笑言：「我一醒番你就短髮，差啲唔認得你！」之後Dickson更單膝跪地，向蔡思貝送上一紮以蔬菜紮成嘅「花束」，場面好似求婚一樣。

問蔡思貝呢日佢哋係咪以情侶檔身份出騷？佢話：「係好朋友身份！」更感情表示：：「佢暈咗時我好震驚，即刻趕去醫院，我發現自己好珍惜呢個朋友，可以話友情升溫！」Dickson聞言即向思貝講「對唔住」。

余德丞：醫生話我係心律不正

Dickson就親自憶述昏迷當日嘅情況：「當時踢踢吓波有啲眼瞓，咪出咗場邊休息，跟住就瞓着咗⋯⋯之後醒番，其他嘢完全冇印象，係聽媽咪講我瞓咗兩、三日，醒番就認得屋企人，雖然唔係落到床咁誇張，但真係奇迹嚟！醫生話我心臟亂跳，即係心律不正。」

講到外表瘦咗唔少，Dickson直言：「其實體重差唔多，醫生叫我呢兩個月唔可以做劇烈運動，淨係可以踩吓室內單車，我咪睇吓波先，踢波就出年先再踢。」講到大病過後嘅得著，佢就話：「個人慢活啲、珍惜生命同朋友，以往一句『祝你身體健康』好似冇乜嘢，但經歷過先知一切唔係必然！」

台下有唔少fans到場為Dickson打氣，Dickson藉機感謝喺佢患病期間幫助過佢嘅家人、朋友同fans：「好多謝我媽咪同埋啲親戚，因為我喺醫院嘅時候一日三餐都照顧得我好好，喺昏迷期，都有好多人嚟探我，我好多謝佢哋，就算無嚟醫院嘅我都多謝你哋啲訊息，仲有啲粉絲DIY卡、拍嘅片，同埋全香港嘅市民又為我集氣令到我醒返！」

第一次見家長

呢日蔡思貝父母都有到場參觀活動，見到Dickson向蔡思貝「求婚」嘅場面，蔡媽媽即場拍晒手掌，原來Dickson第一次見蔡思貝父母，呢對緋聞情侶更唔介意同蔡父蔡母一齊合照影「全家幅」。

蔡思貝笑言：「我十個有九個朋友都見過我爹哋媽咪，我爹哋媽咪好開通，好鍾意同我啲朋友打成一片！」Dickson即刻話：「係咩？咁我都過去同佢哋打成一片先！」

余德丞出院後歎牛腩撈粗

由於醫生勸余德丞出院後要多休養中，如非公開活動，他也鮮有露面，不過本刊記者早前就影到余德丞與男性朋友揸車去到筲箕灣東大街嘅安利食嘢！見佢着住黑tee同短褲，戴住cap帽，驟眼望落整體精神都叫幾好，不過身形就明顯比之前消瘦！

余德丞接受記者訪問

余德丞見到記者依然笑容滿面，出停車場後更邊行邊接受訪問，相當友善！當問及其身體情況時，Dickson指自己身體狀況唔錯，而且指自己體重同出事前差唔多。

至於工作方面，Dickson直言若有拍攝嘅工作就應該唔會停，但始終都需要交由公司再安排，並強調會以休息為先。

Dickson食完嘢之後再次接受本刊記者訪問，當問到需唔需要喺飲食上介口，佢就話西醫並冇特別講話要。

之前有指原本有兩套劇集嘅角色意屬余德丞，但因佢出事入院，令劇集需另外換演員頂替，對於係咪錯失拍劇機會，Dickson則表示：「冇特別問到。」

由於Dickson出事入院後曾有圈中好友到醫院探訪，當被問及有冇相約其他好友相見，佢就指：「自己暫時唔係見咗好多朋友。」另外，Dickson需要休息幾耐，佢就話：「要再聽吓醫生點講。」同時，佢亦表示自己仍需要去醫院覆診，但就冇透露係睇邊科嘅醫生。

獲店員於單據留言送祝福

其後，Dickson亦有於個人社交網上載美食，同大家分享牛腩撈粗同油菜。

除此以外，佢仲上載張單據，見到店員寫上「get well soon」祝福Dickson，堅係好有愛呀！

余德丞仲晒患病期間，朋友送畀佢嘅簽名卡，仲有出事前拍緊劇集《鐵探》嘅一班同事嘅簽名！

最想飲珍珠奶茶

之前余德丞一醒番，除咗多謝各位嘅集氣同祝福，仲話過出院想飲珍珠奶茶，唔知依家飲咗未呢？

余德丞被迫辭演兩套劇

余德丞情況穩定固然係可喜可賀，但難免因病情影響工作，所以被逼辭演兩個劇集角色，包括新劇《殺手》和周日劇《救妻同學會》。其中余德丞入院前出席《殺手》的開鏡拜神儀式，佢本來在劇中飾演年青版陳豪，可惜現時未能演出。

星夢歌手伍富橋頂上

據知余德丞辭演的呢兩個角色，都會係由星夢歌手伍富橋接演！《殺手》監製陳維冠回覆傳媒時，承認伍富橋會接替余德丞在《殺手》中的角色，佢表示余德丞需要多啲時間休息，而且佢喺《殺手》只係客串一集，如果夾硬拍攝而出問題就好唔抵。

延伸閱讀：

華姐亞軍林宣妤 簽約後從未演出 成無綫2019年秘密武器？