江嘉敏手腳不協調 陳豪排舞慢半拍 Roll機即嚟料!

·2 分鐘文章
陳豪領舞,與李君妍等演員拍攝大場面。
陳豪領舞,與李君妍等演員拍攝大場面。

陳豪與江嘉敏等日前為新劇開工,拍攝一場跳舞求婚戲,眾人於拍攝前排舞,陳豪一度慢半拍跟不上節奏,幸開機後即變番「舞王Mo」,大騷舞技!而江嘉敏自嘲手腳不協調,不過拍攝時總算順利過關。

無綫新劇《四十二章經》早前於何文田拍攝外景,場口講述陳豪、江嘉敏、周嘉洛、鄺潔楹(Judy)齊齊跳舞幫鄭子誠求婚,導演於正式拍攝前找來排舞老師為各人排舞,其中一身神父裝束的陳豪起初似未能跟得上節奏,總是比人慢半拍,但到正式Roll機時,他突然「舞王」上身,有姿勢有實際,成功令鄭子誠抱得美人歸。

事後陳豪受訪時笑說:「今次個劇比較輕鬆,而且劇中有好多唔同元素,舞蹈只係其中一樣我哋要表演嘅,仲有好多搞笑嘅群戲,大家整體合作都好開心、順利。」而Judy指睇劇本時已知「唔嘢少」:「都想多啲時間排,但因為太趕,只可以即場排,阿Mo(陳豪)最辛苦,因為佢喺頭排唔錯得。」問到心目中理想求婚方式,她自言比較簡單,最怕對方找來一班朋友搞「大龍鳳」,她說:「喺網上睇過太多好有心思嘅求婚,但最後個女仔係Say No。」她指曾有術數師指她有閃婚的可能,她亦表示認同,更自爆希望34歲前生BB。

周嘉洛呻唔夠瞓

另外,江嘉敏表示讀書時曾學跳舞,但自嘲手腳不協調:「好在係拍住周嘉洛,佢跳舞好厲害。(好似拍得幾趕,辛唔辛苦?)少少,不過有Judy、嘉洛、糖妹佢哋一齊成日講傻嘢,好開心。」她續表示劇中會首嘗吊威吔滋味,受傷也是必然,但辛苦得來「好好玩」,最遺憾是未能參與開槍場面。至於獲讚舞功了得的周嘉洛,眾人排舞期間,他被發現獨坐一旁閉目養神,他解釋:「前一晚瞓得唔好,體力上唔係最好狀態,所以搵個地方抖抖。」

江嘉敏笑言多得周嘉洛傍住,拍跳舞戲都較順利。
江嘉敏笑言多得周嘉洛傍住,拍跳舞戲都較順利。
鄺潔楹直言最怕日後被求婚時搞「大龍鳳」。
鄺潔楹直言最怕日後被求婚時搞「大龍鳳」。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能