法與情｜蘇永康暴脹身形被指撞樣胡慧沖 經典歌曾被惡搞成《越食越開心》

ViuTV劇集《法與情》踏入結局周，雖然播出以來評價好壞參半，但飾演師奶富婆Dora嘅葉璇與網上投資導師HUGO（關智斌飾）一幕床戲成熱話；另外，有份出演TVB經典劇集《壹號皇庭》嘅蘇永康及劉美娟再度於《法與情》合作同樣引起網民討論，前者演繹律師角色，後者則升呢做法官。日前，劇情進入高潮位藥廠案，蘇永康於第15集以藥廠老闆Roger（劉浩龍飾）代表律師林大狀角色登場，不過其暴脹身形就驚親一班網民！

早於劇集播出前，監製伍健雄PO出與身穿律師袍兼戴假髮嘅蘇永康、劉美娟合照，當時已見蘇永康身形和面部皆齊齊發福。及後，蘇永康曾於第11集出場與郭大狀（謝安琪飾）打官司，當時同樣被指身形暴脹；而蘇永康於第15集脫去大狀袍和律師假髮，改以西裝出場，更加將其腫脹身形呈現於鏡頭前，被網民指與「泰國通」胡慧沖撞樣：「蘇永康個樣搞到咁」、「那誰？ 變咗胡慧沖咁」、「肥到鼻都大埋」及「那誰肥到」等等。其實，蘇永康與胡慧沖過往多次被指外貌極相似，胡慧沖更曾於2018年邀請製作團隊為佢將蘇永康經典歌曲《越問越傷心》改篇成惡搞版《越食越開心》，除咗自資拍MV，胡慧沖亦花上幾千元訂造一副與蘇永康所戴嘅墨鏡相似嘅款式，加上假髮神還原蘇永康嘅造型。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！