法與情｜ViuTV新劇陳靜激罕素顏演技被讚 謝安琪被指戲屎網民感伏味濃

由謝安琪、余安安、葉璇、陳靜等人演出嘅ViuTV新劇《法與情》已於周一（18日）開播，播出時間為星期一至五晚上9時半。劇情講述專替富商打官司嘅大律師Angel（謝安琪飾）為爭奪兒子撫養權而接一宗法律援助案以提升個人品德聲望，不過卻接到一宗誤殺案，期間不但找到關鍵證據幫單親媽媽Lisa（陳靜飾）洗脫罪名，更尋回自己6年前嘅初心，促使佢重新調查當年藥廠一案，又意外喺一宗桃色詐騙案中發現藥廠一案新線索，面對一場又一場法與情嘅對決。雖然謝安琪久未拍劇重新「復出」、陳靜又於劇中激罕以素顏零眼妝示人成為賣點，但網民認為仲有好多位感到伏味濃，更指《法與情》有陣TVB味。

《法與情》伏位1：雲集眾多TVB演員
謝安琪與余安安於劇中有唔少對手戲，面臨師徒決裂，有唔少針鋒相對場面，呢個組合搭配相當驚喜。不過，《法與情》雲集眾多TVB舊演員，包括葉璇、賈曉晨（JJ）、陳秀珠、劉美娟、陸駿光等等，令人感到TVB味濃，又覺得ViuTV唔畀機會自家藝人。另外，有份出演嘅蘇永康、劉美娟亦係相隔20年《壹號皇庭》後再合作，有網民就直言有劇集TVB味濃，留言話「有陣tvb味」、「TVB 味confirmed」及「以為睇緊TVB」等等。

《法與情》伏位2：重TVB味劇集收視未如理想
近年來，ViuTV都係以運動題材自家製劇集及BL劇集帶來高收視，例如《I SWIM》、《大叔的愛》等等。然而，加入前TVB演員嘅劇集多數收視奇差，例如宣萱、張慧儀演出嘅《極度俏郎君》、胡杏兒、吳家麗、陸詩韻、沈卓盈演出嘅《熟女強人》等等。

《法與情》伏位3：劇集監製為《熟女強人》監製
伍健雄曾經為電影《喜愛夜蒲3》、《12日》、《紮職3》等電影擔任監製，經驗豐富，但監製ViuTV劇集《熟女強人》嘅表現就未如理想。一班網民亦未有抱太大期望，甚至有網民直言：「伍建（健）雄 don’t expect too much」。

《法與情》伏位4：謝安琪演技惹劣評
女主角謝安琪甚小參與劇集演出，2014年曾客串演出TVB劇集《老表，你好hea！》，但講到真係擔任女主角就係2016年嘅事，當年謝安琪於劇集《殭》嘅表現就被批評過分造作，時時扮可愛，令人懷疑佢今次《法與情》嘅演出會唔會有進步。謝安琪演技備受質疑，但為劇集所唱嘅主題曲MV《撕裂的樂章》出爐後，均被讚唱得好好。劇集出街後，唔少網民紛紛留言指Kay戲屎，例如「人妻好kick喎，極其量都係有語氣咁講對白，完全唔係做緊戲」、「謝安琪啲演技真係⋯」及「原來張繼聰啲戲仲好過佢老婆」等等。

雖然有唔少伏位，但《法與情》仍有一定看點，例如出演謝安琪助手嘅COLLAR成員芯駖，唔單止首次登拍劇加挑戰喊戲，獲岑珈其大讚其演出；而陳靜飾演被控誤殺嘅單親媽媽，同樣被網民激讚其演技，又指佢演活八婆仔性格。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！