法證先鋒6｜馮皓揚奪金像獎「最佳男配角」後首拍電視劇 自幼患亞氏保加症對角色有共鳴

馮皓揚（羊羊）於2022年憑《媽媽的神奇小子》「少年版蘇樺偉」一角勇奪《第四十屆香港電影金像獎》最佳男配角獎項，以17歲之齡撼贏古天樂、林雪等入圍者；近日，佢就喺TVB熱播劇集《法證先鋒VI：倖存者的救贖》飾演霍寶英（王敏奕飾）細佬霍寶樂，同時亦係一名自閉症患者，再度挑戰演技。

《法證先鋒VI：倖存者的救贖》為馮皓揚首套參演嘅電視劇集，其角色係一名電腦專家，擅長記一大堆資料及數字，不過於家中長時間穿着整齊恤衫及西褲、說話時唔鍾意望人、對食物順序和數字有偏執要求及堅持等等，但就曾憑藉其專業協助星柏（黃宗澤飾）成功破解沙井腐屍案。馮皓揚表示自己唔會將霍寶樂與《媽媽的神奇小子》蘇樺偉兩個角色刻意比較，認為每個角色都係獨特並有自己嘅節奏同習慣：「要去摸清楚一個有自閉症嘅角色，我認為最花功夫係要了解佢嘅思維模式，因為睇嘢嘅角度可以同一般人好唔同，以霍寶樂為例，好多時候睇嘢唔會以感性行先，會以呢件事嘅正當性去衡量，係一個有正義感嘅人。」馮皓揚又指，因自己患有亞氏保加症，所以對寶樂呢個角色易有共鳴：「我唔太擅長社交，霍寶樂同樣、甚至比我更加不擅長，所以一定程度上都會有少少共鳴。

馮皓揚自細對演戲深感興趣，曾參與童星訓練班，2021年決定輟學追夢，於金像獎台上分享得獎感言時曾表示會用自己最大努力演好每個角色報答家人：「繼續謙虛做每個角色，做個出色的香港演員。」馮皓揚於得獎翌日入讀TVB藝員訓練班，認為自己喺講嘢方面比較弱，希望糾正懶音，變得字正腔圓；其舉動就嚇親一班網民，部分網民對導師實力有保留，又指馮皓揚點解咁搞笑調轉走去浸啲電視味出嚟，質疑佢自貶身價。不過，馮皓揚最後上咗一日堂就退學，有指係因佢覺得課程未必適合拓展其演藝事業，及教學模式與預期有落差。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！