浪漫十幾次 有血有汗 丁子朗被馮盈盈整傷尾龍骨

馮盈盈與丁子朗在新劇中首演情侶，雖然兩人在劇中只有小量親熱戲，但不乏浪漫情節，不過兩人卻同告受傷，丁子朗為孭女方而弄傷尾龍骨，盈盈則被刮花美腿，浪漫背後有血有汗，有苦自己知。

藝人馮盈盈與丁子朗（丁丁）昨日現身無綫新劇《妳不是她》的拜神儀式，兩人在劇中飾演情侶，講到親熱戲，盈盈笑言最大難度在於要拍出來感覺浪漫，但男女主角親密鏡頭卻很少，要靠內心戲去表達。丁丁就大讚盈盈靚女，故很容易投入角色，不過他自爆拍攝其中一個浪漫場口時卻不慎受傷：「因為佢要從後跳上我個背脊，跳咗十幾次，整到我條尾龍骨好痛。」盈盈指對手拍到內傷，自己亦拍到外傷：「因為佢孭住個背囊，個背囊有啲扣，所以𠝹花咗我對腳，所以係拍到有血、有淚同有汗。」

另外，盈盈自言雖然相隔2年再拍劇，但沒有不習慣：「我係冇拍劇，但一直有開工，我哋係專業，隨時都可以投入番，而且個劇本寫得好出色，所以好容易投入。」丁丁大爆對方在圍讀劇本時已忍不住落淚，盈盈否認被以前的愛情經歷而觸動，只是代入了劇集角色，又讚對白到肉。

彭慧中女神變阿媽

同場的《流行都市》女神彭慧中首次拍劇，並要飾演人母，她自認隨和，歡迎任何角色。對於有指林凱恩加入《流行都市》是頂替她，她說：「冇話頂唔頂，我都係同以前一樣一星期拍一、兩次節目，其實之前都好多人加入，以我所知就唔係頂替我。（嚟緊主力拍劇？）唔到我話事，最緊要有工開。」她指跟劇中老公沒有親熱場口，且打扮樸素毋須騷身材，但若劇情所需也不介意以泳裝上陣。