港人引入日本無土種植技術 慳水更易種 送保養鼓勵「植物殺手」嘗試種植

近年室內綠化成為日常，大型商場、辦公室以至家居隨處可見綠色植物。有港人引入日本無土透氣棉種植技術，推出「胖伴棉」產品，較泥土種植更慳水，植物也更易生長，可建構大型環保綠化牆，也有助推廣綠化辦公室及家居。該公司食正近年「Green Office」熱潮，已累售數百萬棵產品；為了鼓勵「植物殺手」重新嘗試種植，購買植物更包一年保養，希望令種植變得更簡單和普及，目標為更多市民培養種植習慣。

記者 Carmen C.

攝影記者 HLKP

今年45歲的馬忠豪（Alvin）是綠色科技公司「Plant Plant」的行政總監。他過往經營出售電腦軟件予製衣行業，09年改為經營綠化牆業務，「想做啲嘢對地球有啲貢獻，想做green」。他原本不諳種植，靠上網自學相關知識，尋找比泥土更好的種植方案時發現日本TOYOTA及SUNTORY公司有相關研發項目，但已被本港一間公司代理，他經介紹到此公司任職，「佢出資金，我幫佢發掘市場，做到某個生意額，佢就會畀部份股份我」。可惜此承諾並無兌現，他原本灰心打算轉行，此時TOYOTA及SUNTORY邀請他任此技術的香港代理。2018年底他投資一千萬元開公司，正式在香港代理「有機無土透氣棉」專利技術。

「胖伴棉」較泥土慳水六成半

此專利技術產品名為「胖伴棉」（Pafcal），由樹皮、椰子殼等36種有機物質組成，任何植物均可使用，不如泥土般容易弄污周邊，出廠時亦會確保沒有蚊蟲，有客人亦明言「我哋office幅地氈好貴，唔想整污糟」；胖伴棉不用像普通泥土種植般「兜頭淋水」，而是在底部約2厘米處加水，胖伴棉便會吸水「變胖」，內裏水及空氣會維持特定比例。用家亦可透過觀察胖伴棉的乾濕度，計算淋水時間及水量，避免「浸爛根」或「乾死」。此吸水方法可更慳水，以一平方米綠化牆為例，胖伴棉每月只需淋水67.5公升，較泥土種植少六成半，種植的植物根部也會較強壯。

Alvin指近年不少辦公室奉行「Green Office」，現時約有100間大型上市公司、跨國銀行、投資顧問、律師樓等，已選用Plant Plant為公司綠化，當中包括Google、東亞銀行、Apple、仲量聯行等。疫情之下該公司的生意不跌反增，「大家喺屋企多咗，不如搵啲健康啲嘅嘢做吓」，現時各範疇合共已累積售出數百萬棵透氣棉連植物。Alvin指曾有商業大廈電梯大堂設置綠化牆配柔和音樂，「物管經理話都唔知點解，以前啲人會打尖、鬧交，整完幅牆又真係無咗呢啲事」。Alvin嘆謂：「感覺好幸福，呢個就係我哋好想去推動種植物嘅原因」。

公司同時亦有推廣個人綠化，在太古開設實體店。曾有長者逛店時認識胖伴棉技術，花了百多元買植物回家；至周末兒女回家後以為長者被騙，到場「找晦氣」，店員解釋後亦願意試種，「過咗一排仲成家一齊拎晒屋企啲盆裁嚟，想將啲泥換晒做胖伴棉」。Plant Plant在facebook設群組讓用家交流心得，群組已有逾2,300名成員，當中不少自稱「植物殺手」，但都能夠成功用用伴棉種植。

買植物包一年保養 「死咗換返棵畀你」

Alvin指公司其中一個目標，是希望每年可增加0.1%世界人口參與種植，「想你種得到、又種得好，愈種愈多」；將綠色生活帶入家居，就令綠化變得有持續性。「有啲人曾經種過植物，但種死咗，其實佢哋係有心種植，但可能會驚自己變成植物殺手，我就係想呢一班人重新試下」，故購買Plant Plant的植物，會包含一年保養，「做好測光、淋啱水，如果棵植物一年內都係死咗，我哋會換返棵畀你」。

新塗層助吸臭氧

臭氧的最大來源為汽車廢氣，TOYOTA約五年前被歐盟要求解決此問題，遂研發塗層技術，將臭氧轉化成氧氣。Plant Plant就將此最新技術「Ozone Eater」的塗層塗上胖伴棉上，以分解臭氧。南豐發展旗下商場啟德「Airside」的環保綠化牆也用上此技術。該集團委託Plant Plant於大型電子屏幕周邊架設逾6萬棵植物、逾千平方米的綠化牆。南豐發展有限公司香港地產處工程部副總經理區子昌指，商場其中一面面向太子道東，加上設巴士總站，「我哋希望多少少綠化，令成件事更加nature」。

此幅環保綠化牆耗資800多萬元，價錢是普通綠化牆的一倍，亦是集團旗下物業最大的綠化牆。區子昌認為「值得投資」，「由概念到淨化，再去到無土棉可以回收，呢個一籃子嘅eco system令我哋選用」。他亦希望綠化牆可作淨化減碳之用，「目標每年可以減少1.12噸二氧化碳、淨化17克臭氧」，再配合無土種植技術，每年可慳120噸水。配合自動加水系統可減少淋花人手之餘，「少咗人喺高位同外牆位高風險工作」。

研加入回收咖啡渣

Alvin計劃於今年內將胖伴棉生廠房從內地搬回香港，並研發加入回收咖啡渣的「胖伴棉2.0」。由於咖啡渣偏酸性，更適合用作種植士多啤梨、藍莓等「喜酸植物」；「唔知呢個訪問有無機會令我哋同咖啡店合作，如果有客人買咗好多咖啡產品，就可以送一棵咖啡渣胖伴棉嘅植物苗畀佢哋呢？望住棵植物一路飲咖啡，再望住佢愈嚟愈大，lifestyle就係咁樣」。