港女講日：男人故意觸碰你身體 唔同部位暗示有唔同意思？

男女相識後，點先知對方對你有冇好感?直接問人又唔係幾好，不如參考日本網站modelpress早前針對「肢體觸碰部位」進行嘅心理分析，了解男生對你有咩企圖啦。

1. 膊頭: 親切感覺

膊頭算係異性間比較好易掂到嘅身體部位，男生觸摸女生膊頭嘅心理，包含應援、守護可愛後輩成長嘅情緒。所以，男生搭你膊頭，未必一定對你有意，好大機會係鍾意同你做朋友，而唔係想做戀人。

2. 手: 想拉近距離

就算交情再好嘅異性朋友，都唔會隨便拖手，所以觸摸部位如果係手，唔多唔少都係希望可以再進一步。如果男方成日有意無意掂到你隻手，已經畀咗好大signal你喇。

3. 頭: 覺得可愛

摸頭動作，對唔少女生有超大殺傷力!但以男生心理，係「覺得可愛」、「疼愛」嘅大男人心態居多。覺得你好似一隻可愛小動物，忍唔住無意識地好想摸一摸，記住，覺得你kawaii唔等於想同你發展呀。

4. 面珠墩: 表達愛意

用手指戳或搣女生面珠墩，幾乎可以認定係「愛上你」嘅一種表現。男生覺得女生超可愛，希望藉住呢個小動作令對方小鹿亂撞，拉近彼此距離。

5. 大腿: 想曳曳

咁明顯摸到大腿，當然心有邪念啦，除非女生本身鈍到一個點，唔係一定會明白對方心理。如果女生冇呢個意思，最好立刻採取拒絕行動令男人死心。

圖片來源: ぱくたそ